Tɔ́rilɔ 21 - Sénoufo Nyarafolo

Isirayɛliyé pe 'fànʔa taa kùlofɔli Aradi nɛ̄ wè

¹ Fànʔafɔli wáà 'puu baa, Kanaa kùlo wuu ŋáà wi 'puu Aradi kàʔa tɛ́nimɛ kàfɔli wè, baa Nɛgɛvi waama kùlo nī lè. Bà wi 'ki lúʔu Isirayɛli siɛnnɛ piyē nɛ báan Atarimi koligo nɛ̄ gè, a wi 'yiri nɛ̀ sɛ́nì tuu pe nɛ̄ nɛ̀ pàli cò pe nī.

² A Isirayɛli siɛnnɛ pe 'nyuɔ kún nɛ̀ kɛn Yewe mɛ́ nɛ́ jo: «A muɔ 'ki yaʔa weli siɛnnɛ bálì jáa bèle, weli bé pe kàaya yi mìɛni cúʔɔ bè yige baa péwu.»

³ A Yewe 'Isirayɛliyé náarigɛ lúʔu gè, a wi 'ki yaʔa a pe 'Kanaa siɛnnɛ jáa bèle. Kàaya nyáà yè, nɛ́ yi siɛnnɛ ní bèle, a pe sí yi mìɛni 'cúʔɔ nɛ̀ yige baa péwu nɛ̀ yɛli nɛ́ Yewe kàyuʔujuuro ní dè. A pe sí ki tiʔɛ míʔɛ le gè nɛ ki yeri Worima kàʔa (ki kɔri wire wī: cúʔɔmɔ tiʔɛ).

Kányiɛrɛ wɔ̀bugɔ siɛnrɛ dè

⁴ A Isirayɛli siɛnnɛ pe 'yɛ̀ nɛ̀ yiri Wori nyagurugo tiʔɛ nī gè nɛ̀ tóri Nyàʔanivɛgɛ Tiire kuʔɔjii koligo nī gè nɛ̀ màʔa Edɔmi kùlo kúrugu lè. A siɛnnɛ pe ń'nɛ̀ pe 'funyɔ wári yè koligo nɛ̄ gè.

⁵ A pe ń'nɛ̀ koli nɛ̀ Kulocɛliɛ nɛ́ Misa sànʔa wè cígini, a pe 'jo: «Gáa nɛ̄ yeli 'weli yige Ezipiti kùlo nī lè ? Kire ga buu weli ní ba kùu náʔa gè waama kùlo nī lé ? Nɛ́ ki cɛ́n yaliire wè náʔa gèʔ, luʔɔ míɛni wè bile we- gbuɔʔ ! Weli tɔ̀ni nɛ̀ kɛ́nì fùrɔ mana yakaara dáà nɛ̄ dè, dàa ti wè yafiɛn dèʔ  !»

⁶ A Yewe sí wɔ̀burɔ táà yige pe kúrugu dàa dī suɔnrɔ ní dè, a ti siɛnnɛ nɔgi bèle. A siɛnniʔɛmɛ 'kùu Isirayɛli siɛnnɛ nī bèle.

⁷ A siɛnnɛ pe pɛ́nì ki juu Misa mɛ́ nɛ́ jo: «Weli nyɛ́nì kapiile kpíʔile bà weli siɛnrɛ dáà juu dè nɛ̀ wáa Yewe mɛ́ wè nɛ́ muɔ tíimɛ ní wè. Píra ŋáà nī wè, -Yewe náari wè weli mɛ́, kire ga buu wi- wɔ̀burɔ dáà láʔa dè weli nɛ̄.» A Misa sɛ́nì Yewe sùlu wè nɛ̀ pe kɛn.

⁸ A Yewe 'ki juu Misa mɛ́ wè nɛ́ jo: «Te waa ma sa kányiɛrɛ wɔ̀bugɔ kpíʔile, ma ki súu ma nɔri kàgɛnidɔnigɔ káà nɛ̄ ma ki cɔ́ri ma yérige. A ki pɛ́nì nyaa wɔ̀bugɔ káà 'siɛn nɔ wè, a kire siɛn wi sɛ́nì yiʔɛ yɛ̀gɛ gè nɛ̀ kányiɛrɛ wɔ̀bugɔ wéli gè, wiǐ ní kùuʔ.»

⁹ A Misa 'ki kpíʔile bɛ̀ Yewe 'ki juu gè, nɛ̀ kányiɛrɛ wɔ̀bugɔ kpíʔile gè nɛ̀ ki tùɔn kàgɛnidɔnigɔ nɛ̄ gè, nɛ́ ki cɔ́ri nɛ̀ yérige. A wɔ̀bugɔ káà cé siɛn nɔ wè, a siɛn wi 'yiʔɛ yɛ̀gɛ gè nɛ̀ kányiɛrɛ wɔ̀bugɔ wéli gè, wi nɛ̂ puʔɔ.

Isirayɛliyé pe 'nɔ̀ Kanaa kùlo láʔala nɛ̄ lè

¹⁰ A Isirayɛli siɛnnɛ pe 'kɛ́ nɛ̀ sɛ́nì pe bùguro kpúɔn dè Woboti tiʔɛ nī gè.

¹¹ A pe ń'nɛ̀ sìʔɛrɛ nɛ̀ yiri Woboti tiʔɛ nī gè nɛ̀ sɛ́nì pe bùguro kpúɔn dè Iye Abarimi tiʔɛ nī gè, baa waama kùlo nī lè, Mowabi kùlo cɛngɛnyɛnifoligɔli mɛ́ gè.

¹² A pe ń'nɛ̀ yɛ̀ nɛ̀ núgo kire tiʔɛ nī gè nɛ̀ sɛ́nì pe 'bùguro kpúɔn dè Zɛrɛdi kápaligɛ tiʔɛ nī gè.

¹³ A pe ń'nɛ̀ kɛ́nì koli nɛ̀ yɛ̀ kire tiʔɛ nī gè nɛ̀ sɛ́nì pe 'bùguro kpúɔn dè Arinɔni lakoligo kúrugu gè. Kire lakoligo gáà ki 'puu nɛ sùurí Amɔriyé kùlo nī lè, nɛ̀ sɛ́nì sùurí waama kùlo tiʔɛ nī gè; kire ki pɛ́nì kò Mowabiyé kùlo nɛ́ Amɔri kùlo láʔadiʔɛ gè.

¹⁴ Kire nɛ̄ a pe 'ki sɛbɛ Yewe Kapiɛngbuɔn Sɛbɛ nī wè, nɛ́ jo: Wayɛbi ŋáà wī Sufa tiʔɛ nī gè, nɛ́ ki kápaliyɛ ní yè, nɛ́ Arinɔni kápaligɛ ní gè;

¹⁵ nɛ́ ki gòriyo ní yè nyàa yi fúu nɛ waa Ari kàʔa tɛ́nimɛ kɔli mɛ́ gè, nɛ̀ sɛ́nì nɔ̀ Mowabi kùlo láʔala nɛ̄ lè.

¹⁶ A pe ń'nɛ̀ yɛ̀ nɛ̀ kɛ́ nɛ̀ sɛ́nì nɔ̀ Bɛri kɔ̀lɔ tiʔɛ nɛ̄ gè, kire kɔ̀lɔ ŋáà wire tiʔɛ nī Yewe yé ki juu Misa mɛ́ nɛ́ jo: «-Siɛnnɛ gbuʔulo bèle, kire ga buu mi- luʔɔ kɛn pe mɛ́.»

¹⁷ A Isirayɛli siɛnnɛ pe 'pínɛ nɛ̀ ŋúnugo gáà ŋú gè nɛ́ jo: «Ye- puu weri ŋú ! Luʔɔ, te yigi kɔ̀lɔ nī wè !

¹⁸ Kɔ̀lɔ n'ŋɛ ŋàa fànʔafɔlilɔ pe 'túgu wè, á siɛnkpolilo pe 'wi túgu wè nɛ́ pe fànʔa kàgbiʔile ní gèle, nɛ́ pe kpòyo ní yè.» A pe ń'nɛ̀ yɛ̀ waama kùlo tiʔɛ nī gè, nɛ̀ kɛ́ nɛ̀ sɛ́nì nɔ̀ Matana tiʔɛ nī gè;

¹⁹ nɛ̀ ń'nɛ̀ yiri Matana tiʔɛ nī gè, nɛ̀ kɛ́ nɛ̀ sɛ́nì nɔ̀ Naʔaliyɛli tiʔɛ nī gè; nɛ̀ ń'nɛ̀ yiri Naʔaliyɛli tiʔɛ nī gè, nɛ̀ kɛ́ nɛ̀ sɛ́nì nɔ̀ Bamɔti tiʔɛ nī gè;

²⁰ nɛ̀ ń'nɛ̀ yiri Bamɔti tiʔɛ nī gè, nɛ̀ kɛ́ fúɔ nɛ̀ sɛ́nì nɔ̀ Pisiga nyagurugo ki dàlikpuʔɔ naamɛ gè, gàa ki 'puu Mowabi kùlo nī lè nɛ̀ yiʔɛ wáa gè waama kùlo mɛ́ lè.

Isirayɛliyé pe 'kùlofɔli Sikɔn jáa wè

²¹ A Isirayɛli siɛnnɛ pe 'tunduro tun Sikɔn mɛ́, Amɔriyé kùlofɔli wè, nɛ́ wi yɛ:

²² «-Weli yaʔa weli sùuri muɔ kùlo nī lè. Weli sì je jíin muɔ siʔi káà nīʔ, bé nɛ́ ga jo ɛrɛzɛn siʔi káà nī wīʔ. Weli míɛni sì je muɔ kɔ̀lɔ wáà luʔɔ gbuɔʔ. Weli béri waa kùlofɔli koligo yákuɔ nī gè, fúɔ bè taa weli sa sùuri bè yiri muɔ kùlo nī lè.»

²³ Kire nɛ́ ki mìɛni Sikɔn sì yéri ki nɛ̄ Isirayɛli siɛnnɛ pe 'sùuri wire kùlo nī lèʔ. A wi 'wi kapiɛngbuɔnnɔ pe mìɛni kɔ́ri, a pe 'yiri nɛ̀ sɛ́nì Isirayɛli siɛnnɛ kpàli bèle waama kùlo nī lè. Bà wi sɛ́nì pe kpàli Yaʔazi tiʔɛ nī gè, a wi 'tuu Isirayɛli siɛnnɛ nɛ̄ bèle.

²⁴ A Isirayɛli siɛnnɛ pe 'wi jáa nɛ́ pe kapiɛngbuɔn ŋuʔɔnɔ ní gèle. A pe 'wi kùlo suɔ lè wi mɛ́, nɛ̀ ki líɛ Arinɔni lakoligo nɛ̄ gè fúɔ nɛ̀ sɛ́nì nɔ̀ Yabɔki lakolibile nɛ̄ lè, nɛ́ ń'nɛ̀ màʔa nɛ̀ sɛ́nì yiri Amɔyé kùlo láʔala nɛ̄ lè, nɛ̀ ki yaʔa Amɔyé kùlo láʔala nɛ̄ lè ki fànʔa ki 'puu lìrige; pe 'puu nɛ ki wéli.

²⁵ A pe 'Amɔriyé kàaya yi mìɛni líɛ yè, nɛ́ míɛni Kɛsibɔni kàʔa ní gè nɛ́ vòyo nyáà yi 'puu ki tɛ́nimɛ nī bè. A pe 'yi líɛ a yi 'kò pe woyo.

²⁶ Ki 'nyaa Kɛsibɔni kàʔa kire yé puu Amɔriyé kàkpuʔɔ gè; Sikɔn wire sí wi 'puu Amɔriyé kùlofɔli wè. Wire wi yé kapiɛnnɛ kpúɔn lè nɛ́ Mowabi kùlofɔli ní wè, nɛ́ wi jáa nɛ̀ wi kùlo suɔ lè wi mɛ́ fúɔ nɛ̀ sɛ́nì nɔ̀ Arinɔni lakoligo nɛ̄ gè.

²⁷ Kire nɛ̄ bàli piyē nɛ ŋúnuyɔ ŋú yè, a pe 'kò nɛ̀ ki ŋú nɛ́ jo: «Yeri báan Kɛsibɔni kàʔa mɛ́ gè ! Ki kàʔa ki- sí ní koli bè faan; Sikɔn kàʔa gè, ki- sí ní faan yérige !

²⁸ Nɛ́ ki cɛ́n kàsun nyɛ́nì yiri Kɛsibɔni kàʔa nī gè; kàsunnyige nyɛ́nì yiri kùlofɔli Sikɔn kàʔa nī gè. Kire ki 'Ari kàʔa tɛ́nimɛ sórigo bè Mowabi kùlo nī lè, nɛ́ Arinɔni tiɛkpaʔaliyɛ ní yè nɛ́ ki tiɛyɛ kàfɔlilɔ ní bèle.

²⁹ Yawuʔɔ yē muɔ nɛ̄, Mowabi kùlo ! ʔaan, muɔ nyɛ́nì cúʔɔ, muɔ nɛ́ muɔ siɛnnɛ ní bèle bàli bīɛlɛ pe 'Kɛmɔsi sungu wè ! Mowabi, muɔ jaala pe nyɛ́nì fɛ̀; Sikɔn, Amɔriyé kùlofɔli wè, wi 'muɔ pórilo cò bèle.

³⁰ Weli nyɛ́nì muɔ siɛnnɛ súbulo bèle nɛ̀ fúrugi nɛ́ ŋaaya ní yè, a pe mìɛni 'kùu, bè ki séli Kɛsibɔni kàʔa nɛ̄ fúɔ bè sa nɔ̀ Dibɔni kàʔa nɛ̄ gè. Ti mìɛni nyɛ́nì cúʔɔ fúɔ nɛ̀ sɛ́nì nɔ̀ Nɔfaa kàʔa nɛ̄ gè, kire gáà gī túɔn Madaba kàʔa táanni gè.»

³¹ A Isirayɛli siɛnnɛ pe 'Amɔriyé kùlo líɛ lè nɛ̀ tɛ́ni baa.

³² A Misa 'siɛnnɛ tun pe- sa Yazɛri tɛ́nimɛ saanri bè wéli. A Isirayɛli siɛnnɛ pe 'Yazɛri vòyo nyáà yi mìɛni líɛ, nɛ̀ Amɔri siɛnnɛ cìra bèle bàli pe 'puu baa yi nī yè.

Isirayɛliyé pe 'kùlofɔli Ɔgi jáa wè

³³ A pe ń'nɛ̀ yiʔɛ nɛ̀ koligo líɛ gè nɛ yɛ̀gí nɛ waa Basan kùlo mɛ́ lè. Ɔgi wè, Basan kùlofɔli wè, a wire 'yiri nɛ̀ pe kpàli nɛ́ wi kapiɛngbuɔnnɔ ní bèle baa Ɛdirɛyi kàʔa táanni gè, nɛ̀ sɛ́nì tuu pe nɛ̄.

³⁴ A Yewe sí ki juu Misa mɛ́ nɛ́ jo: «Fǎga de fìʔɛ́ wi nɛ̄ʔ, nɛ́ ki cɛ́n m'bé ki yaʔa muɔ fànʔa taa wi nɛ̄, wire nɛ́ wi kapiɛngbuɔnnɔ pe mìɛni ní bèle, nɛ́ wi kùlo ní lè. Muɔ bé wi kpíʔile majo bɛ̀ muɔ Sikɔn, Amɔriyé kùlofɔli, kpíʔile wè, wire ŋáà wi 'puu tɛ́niwɛ Kɛsibɔni kàʔa nī gè.»

³⁵ A Isirayɛli siɛnnɛ pe 'Ɔgi jáa wè, wire nɛ́ wi jaala ní bèle, nɛ́ wi kùlo siɛnnɛ ní bèle, fúɔ siɛn nigbe sì ń'nɛ̀ cɛ́nì kò sìi nɛ̄ʔ. A pe 'wi kùlo ni mìɛni líɛ.