Tɔ́rilɔ 13 - Sénoufo Nyarafolo

Misa 'tundunminɔ tun pe- sa Kanaa kùlo saanri lè

¹ A Yewe 'ki juu Misa mɛ́ nɛ́ jo:

² «-Nàguɔlɔ pálì tun pe- sa Kanaa kùlo saanri lè bè wéli, nàa m'bé kɛn Isirayɛli siɛnnɛ mɛ́ bèle. Muɔ bé siɛn nigbe nyíɛnɛ gɔ̀n wi- puu saʔa tùlugo ó saʔa tùlugo nī bàli bīɛlɛ yiɛgininɛ bèle, bè pe tun.»

³ A Misa 'pe tun nɛ̀ ki yaʔa pe ní baa Paran waama kùlo tiʔɛ nī gè, bà Yewe cé ki juu gè. Pe mìɛni yé puu Isirayɛli siɛnnɛ kàfɔlilɔ.

⁴ Pe míɛyɛ yire yī nyàa yè: Samuwa, Zakuri jaa wè, wire ŋáà wi 'puu Wurubɛni saʔa tùlugo nī gè;

⁵ Safati, Wori jaa wè, wire ŋáà wi 'puu Simɛyɔ saʔa tùlugo nī gè;

⁶ Kalɛbi, Yefunɛ jaa wè, wire ŋáà wi 'puu Zuda saʔa tùlugo nī gè;

⁷ Yigali, Yusufu jaa wè, wire ŋáà wi 'puu Izakari saʔa tùlugo nī gè;

⁸ Wosuwe, Nuni jaa wè, wire ŋáà wi 'puu Ɛfirayimi saʔa tùlugo nī gè;

⁹ Paliti, Arafuu jaa wè, wire ŋáà wi 'puu Bɛnzamɛ saʔa tùlugo nī gè;

¹⁰ Gadiyɛli, Sodi jaa wè, wire ŋáà wi 'puu Zabulɔn saʔa tùlugo nī gè;

¹¹ Gadiri, Susi jaa wè, wire ŋáà wi 'puu Yusufu saʔa tùlugo nī gè, Manase saʔa tùlugo nī gè;

¹² Amiyɛli, Gemali jaa wè, wire ŋáà wi 'puu Dan saʔa tùlugo nī gè;

¹³ Seturi, Mikayɛli jaa wè, wire ŋáà wi 'puu Azɛri saʔa tùlugo nī gè;

¹⁴ Nabi, Vofisi jaa wè, wire ŋáà wi 'puu Nafitali saʔa tùlugo nī gè;

¹⁵ Gewiyɛli, Maki jaa wè, wire ŋáà wi 'puu Gadi saʔa tùlugo nī gè.

¹⁶ Nàguɔlɔ bálì peli bīɛlɛ bàli Misa yé nyíɛnɛ nɛ̀ kɔ̀n nɛ́ pe tun pe- sa kùlo saanri lè bè wéli. A Misa 'Nuni jaa Wosuwe míʔɛ yiʔɛ gè, nɛ wi ye Yesuwe.

¹⁷ Bà Misa yé pe tun wè pe- sa Kanaa kùlo saanri lè bè wéli lè, a wi 'ki juu pe mɛ́ nɛ́ jo: «Ye- tóri Nɛgɛvi waama kùlo nɛ̄ lè, ye sùuri nyaguruyo nī yè.

¹⁸ Ye- kùlo saanri lè ye wéli kɛnmɛ bíì nɛ̄ ni yē lè. Ye- ki wéli míɛni mɛni siɛnnɛ pe yē, bàli bīɛlɛ baa kùlo nī lè, a ki yē ŋɔri yē pe nī, kire ga laa piyē ŋɔri fùn dè, a ki yē piyē nìʔɛnɛ, kire ga laa a piyē cɛ̀ri wèʔ.

¹⁹ Ye- ki wéli míɛni mɛni kùlo náà ni siɛnnɛ pe yē bèle, a ki yē niī cɛ̀nnɛ kire ga laa niī sìpiile. Ye- ki wéli míɛni kàaya nyáà nī pe yē bèle, a ki yē yiī vòyo, kire ga laa yiī sùluyo yè.

²⁰ Ye- ki wéli míɛni a ki yē dàala niī tàanna lè, á kire bɛ̀ʔ wè, a niī sìpiɛnnɛ lè, a ki yē tiire yē baa ni nī wè, á kire bɛ̀ʔ, a niī tiire fùn. Ye- gbɛ̀nmɛ le, yeri báan nɛ́ kùlo ni yasɛnrɛ táà ní.» Ɛrɛzɛn pélizɛnnɛ lɛ̀lɛ nī ki yé puu.

²¹ A pe 'fali nɛ̀ yɛ̀ nɛ̀ kɛ́ nɛ̀ ki séli Zɛnɛ waama kùlo tiʔɛ nī gè, nɛ̀ kùlo saanri lè fúɔ nɛ̀ sɛ́nì nɔ̀ Erewobi kàʔa nɛ̄ gè, kire gáà ki 'puu Lebo Amati kàʔa táanni gè.

²² A pe 'sùuri Nɛgɛvi waama kùlo nī lè nɛ̀ sɛ́nì nɔ̀ Eburɔn kàʔa nɛ̄ gè. Kire tiʔɛ nī Anaki pìile pe yé puu: Ayima narigɛ gè, nɛ́ Sesayi narigɛ gè, nɛ́ Talimayi narigɛ gè. Ki 'nyaa, pe yé Eburɔn kàʔa tɛ́ngɛ gè ki yiʔɛlɛ kɔlisiinwoli lire ni 'puu á pe nɛ́ Zowan kàʔa tɛ́ngɛ gè, kire gáà ki 'puu Ezipiti kùlo nī lè.

²³ Bà pe sɛ́nì nɔ̀ Ɛsikɔli kápaligɛ tiʔɛ nɛ̄ gè, a pe 'ɛrɛzɛn kàtogo káà ceri, a siɛnnɛ siin 'ki tùɔn kàgbiile nɛ̄, nɛ́ ki tugo fíkɛnnyuyɔ nɛ̄ yè. A pe 'girenadi yasɛnrɛ míɛni cuɔ nɛ̀ fàri sàanfiidiige yasɛnrɛ nɛ̄ dè.

²⁴ A pe 'ki tiʔɛ míʔɛ le gè nɛ ki ye Ɛsikɔli (ki kɔri wire wī: kàtogo kápaligɛ), bèri sɔ̀ngí de taʔa nɛ́ ɛrɛzɛn kàtogo wuʔu ní gè gàa Isirayɛli siɛnnɛ pe yé cuɔ gè.

Tundunminɔ pe 'koli nɛ̀ pɛn

²⁵ Cɛnyɛ togosiin kúɔmɔ mɛ́ bè, a pe 'kɔ́n baa kùlo ni saanridiʔɛ nī gè nɛ̀ pɛn.

²⁶ A pe pɛ́nì yéri Misa nɛ́ Arawɔn yiʔɛ mɛ́ gè, nɛ́ Isirayɛli tògo siɛnnɛ pe mìɛni ní, baa Paran waama kùlo nī lè, Kadɛsi kàʔa tiʔɛ nī gè. A pe pɛ́nì siɛnnugoro juu dè nɛ̀ tìɛ Isirayɛli tògo siɛnnɛ pe míɛni nɛ̄, nɛ́ kùlo ni yasɛnrɛ tìɛ dè pe nɛ̄.

²⁷ Siɛnrɛ ti n'dɛ dàa pe pɛ́nì juu nɛ̀ tìɛ Misa nɛ̄ wè. Pe 'jo: «Weli tɔ̀ni nɛ̀ jíin kùlo nī lè baa muɔ 'weli tun wè. Kányiʔɛ nɛ̄ nɛ̀yirimɛ nɛ́ sárigɛ kiī nɛ fúu baa kùlo nī lè. Ni yasɛnrɛ ti n'dɛ.

²⁸ «Gàa sí gī baa gè, kùlo ni siɛnnɛ pe tɔ̀ni yē nɛ́ ŋɔri ní díɛʔ ! Kàaya yi mìɛni yē kpoliyo nɛ́ ní sùluyo nɛ́ gunliriye ní wī. Weli cɛ́nì Anaki jaala nyaa bèle; pe sí tɔ̀ni yē nàgakpaʔaliyɛ sìtɔnijɛnyɛ !

²⁹ Nɛ́ míɛni Amalɛkiyé ní bèle, peli yē baa Nɛgɛvi waama kùlo nī lè, nɛ́ Etiyé nɛ́ Jebusiyé nɛ́ Amɔriyé peli yē baa tɛ́ninɛ nyaguruyo tɛ́nimɛ nī bè. Kanaa siɛnnɛ, peli yē tɛ́ninɛ kuʔɔjii táanni wè, nɛ́ Zurudɛn cáʔa gògoyo nɛ̄ yè.»

³⁰ Bà siɛnnɛ pe 'séli nɛ kúnʔɔri Misa táanni wè, a Kalɛbi 'pe yɛ pe- pìiri, nɛ́ juu nɛ́ pe ní nɛ́ jo: «Yeri báan we- kɛ́ we sa kùlo líɛ lè ! Nɛ́ ki cɛ́n weli bé gbɛ̀ jáa bè ki kpíʔile !»

³¹ Siɛnnɛ bálì pe yé kɛ́ nɛ́ wi ní wè, a peli sí jo: «Weli sǐ gbɛ̀ jáa bè tún nɛ́ siɛnnɛ bálì ní bèleʔ, nɛ́ ki cɛ́n pe ŋɔri ti nyɛ́nì niʔɛ nɛ̀ tóri weli ŋɔri nɛ̄ dè !»

³² A pe ń'nɛ̀ kɛ́ yiʔɛ mɛ́ nɛ̀ kùlo faʔa lè Isirayɛli siɛnnɛ yiʔɛ mɛ́ gè, nɛ́ jo: «Kùlo náà tíimɛ weli sɛ́nì saanri nɛ̀ wéli lè, kùlo náà ni cɛ́ni ni siɛnnɛ káa bèle wī ! Siɛnnɛ bálì bīɛlɛ weli 'nyaa bèle, pe mìɛni yē nàgakpaʔaliyɛ wī.

³³ Weli cɛ́nì siɛntɔniyɔ yáà nyaa baa, bàli bīɛlɛ Anaki jaala bèle, bàli bīɛlɛ siɛnfelige nàgakpaʔaliyɛ narigɛ gè. A weli 'yéri pe wàa táanni wè, weli nɛ̂ wìye nyaa kàbariyɛ tíɛlɛ wī, bɛ̀ peli míɛni peli nɛ weli nyaʔa.»