Tɔ́rilɔ 12 - Sénoufo Nyarafolo

Miriyami nɛ́ Arawɔn pe 'Misa sànʔa wè

¹ Ki 'nyaa, Misa cé Kusi kùlo cuɔ wáà líɛ. A Miriyami 'wi sànʔa, a Arawɔn míɛni 'wúɔ nɛ́ wi ní, a pe 'wi sànʔa kire kɛnmɛ nɛ̄ bè.

² A pe 'ki juu nɛ́ jo: «Ki 'nyaa lé, Yewe wire nɛ Misa yákuɔ líi wī lé kàsuluwo wè ? Wi wè nɛ tóri lé weli míɛni mɛ́, níɛ nyu míɛniʔ ?» A Yewe sí ti lúʔu.

³ Misa 'puu nàguɔ wáà ŋàa wi 'puu nɛ màama kpínʔini nɛ̀ tóri siɛnnɛ pe mìɛni nɛ̄ dàala nɛ̄ lè.

⁴ A Yewe 'fali nɛ̀ pɛ́nì juu nɛ́ Misa nɛ́ Arawɔn nɛ́ Miriyami ní, nɛ́ jo: «Yeri mi kpàlí baa, yeli taanri bèle, Kpàlidiʔɛ Kpátaʔa mɛ́ gè.» A pe 'fali nɛ̀ kɛ́.

⁵ A Yewe 'tìgi kàsadibagɛ nī gáà ki 'tɔni nɛ̀ cùungu gè, nɛ̀ yéri Kpátaʔa wìile yiʔɛ mɛ́ gè, nɛ́ Arawɔn nɛ́ Miriyami yeri wè, a pe siin pe 'sìʔɛrɛ nɛ̀ kpɔni wi nɛ̄.

⁶ A Yewe 'ki juu pe mɛ́ nɛ́ jo: «Ye- mi siɛnrɛ lúʔu dè cɛngɛ: a siɛnjuuwo je yiri yeli nī wè, mi Yewe wè, mi nɛ̂ nìɛ tìɛ wi nɛ̄ kɛnmɛ páà nɛ̄, kire ga laa mi nɛ̂ juu nɛ́ wi ní ŋɔ́nigɔ nī.

⁷ Nɛ̀ ki yaʔa bà bɛ̀ʔ ki yē mi baakuɔwɔ Misa wuʔu nɛ̄ gè díɛʔ. Wire wè, mi 'tɛ́ngɛ wire nɛ̄ mi saʔa ki mìɛni nī.

⁸ Wire wè, mi nɛ nyu nɛ́ wire ní térire, kɛnmɛ páà nɛ̄ bàa pi 'fílige bè; ki nɛ̌ nyaa kàsiʔile nīʔ. Wiī nɛ mi Yewe kɛnmɛ nyaʔa bè. Gáa sí nɛ̄ yeli sì fíɛʔ nɛ́ fɔ̀li nɛ̀ mi baakuɔwɔ Misa sànʔa wè ?»

⁹ A Yewe fungo ki 'yɛ̀ kpuʔɔ pe kúrugu, a wi 'kɛ́.

¹⁰ A kàsadibagɛ ki 'fali nɛ̀ yɛ̀ Kpátaʔa naamɛ gè. A yaanyiɛmɛ 'fali nɛ̀ Miriyami cò a wi céri ti 'yiʔɛ nɛ̀ fílige pérepere. A Arawɔn 'yiʔɛ nɛ̀ Miriyami wéli wè, a wi 'ki nyaa: yaanyiɛmɛ 'wi cò.

¹¹ A wi 'fali nɛ̀ ki juu Misa mɛ́ nɛ́ jo: «Mi kàfɔli, mi nɛ muɔ fiɛn wī, fǎga weli kapiile fùrɔgɔ yaʔa gè ki- tuu weli nɛ̄ʔ, nàa weli 'kpíʔile lèʔ, ki 'nyaa ledomɔ pi 'weli kɛn a weli ni kpíʔile.

¹² Cí ! Kiì yɛli wi céri ti- kò bɛ̀ pìfinʔɛ tíɛlɛʔ gàa ki cî kùu ki yàa liyɛ nī yèʔ, dí céri tiʔɛ káà nɛ̂ fúnʔɔ gè !»

¹³ A Misa sí fali nɛ̀ yékpoli wáa Yewe kúrugu wè nɛ́ jo: «Kulocɛliɛ, mi nɛ muɔ fiɛn wī, -wi puʔɔ !»

¹⁴ A Yewe sí ki juu Misa mɛ́ nɛ́ jo: «A ki 'nyaa wi tuu wi cé tíɛnrɛ wáa wi yiʔɛ nɛ̄ gè o, fìɛrɛ sì cî tɔ́nʔ wi nɛ̄ lé cɛnyɛ kɔlisiin sunʔɔmɔ nī bè ? Kire nɛ̄ ki 'yɛli pe- wi yige bùguro nī dè cɛnyɛ kɔlisiin. Kire kàduʔumɛ gè wi bé ní koli bè jíin bùguro nī dè.»

¹⁵ A pe 'fali nɛ̀ Miriyami yige wè bùguro nī dè a wi sɛ́nì cɛnyɛ kɔlisiin kúɔ kpànʔanɛ. Kire nɛ̄ a siɛnnɛ pe 'yéri, piyè cé ń'nɛ puu nɛ waa tánʔana nɛ̄ lèʔ fúɔ nɛ̀ taa a wi 'koli nɛ̀ pɛn bùguro nī dè.

¹⁶ Kire kàduʔumɛ gè, a siɛnnɛ pe 'yiri Katisɛrɔti tiʔɛ nī gè nɛ̀ kɛ́ nɛ̀ sɛ́nì bùguro kpúɔn dè baa Paran waama kùlo tiʔɛ nī gè.