1 Timotius 2 - Allahle a neme heteungekoke homofae

Ei Moloi-Moloi Naei A Usaei

¹ Reyae moi huramaele, Yesusre hakainye ro miyae hiwa yo nanemene na kou kalo naeise Allahre ebeli bonainyele nane merau naei foi aerene Allahre helen foi ungainyele.

² Aei wali aku ban nau ban nekemalerene, nane merau Allah kenare kole wali ma na mekai yae nekemanderene, ondofolo yoni-yoni naeise nane merau aere eise haweyaimele yun-jun nanemene naeise ebeli bonnele.

³ Nebei me u foi nane merau aei Walilo Allah kena kole.

⁴ Allah Naei kena kole ro miyae nanemene hole emmimolombondere nane merau Wali Ondofolole na hele wali nibire isaeinyaibonde.

⁵ Rabuhine ban Allah mbai mo, nane merau Allah bele ro miyae bele a elenate naeise walore beungehake Kiyae mbai sele, Yesus Wali Ondofolo Niyae.

⁶ Aei u mekai beko mokowandere ehee bukulu hayemmele helene, Wali Ondofolo aei ehee bukulu fomaiboi naeise Naei uwa yae kinyeuboke. Nebei me u Allah merau raungehike yane ro miyaere a eungeyoboukoke.

⁷ Allah rare ukeufe nebei are Yahudi ban ro miyaere hufemile nane merau keleremile, ro miyae Yesus Naei a elelere hila rabo halenainyelena, wali hena bona enaiyaronde. Nebei naeise na helebe wamale, reyae ame-ame ebei.

⁸ Reyae kena kale ro yoni-yoni na kena u yolo-yolo yae ikele han ban mae ebelire bonainyele. (Na bere Yahudi ro miyae nane merau me bumare kaeiboyainyele yae ebeli bowainyele.)

⁹ Reyae kena kale miyae maengke nauware molombonde rambun ijokore oyoboiboi ma yae hirenate. Nda mekai yae uware omoloijae: umaa bukuneufike yae, emas yae, mutiara yae, ijokore kabeisi-kabeisi holona yae, uware omoloijae. Nane merau malo roi bumana hele yae uware ehireijae.

¹⁰ Miyae maengke naei ofae kaemae uware molonate nda niyae: u foi wa foi, Allahre eise molainye miyae maengke yae mokoyate wanen mae.

¹¹ Miyae maengke a usaei wasaeise isaeinyate hee, be elae u elae okoijae, kena u ane ranainyehinde nekenate.

¹² Ro yoni-yonire miyae maengke yae a usaei wasaei kelenaimile naeise nane merau miyae yae ro yoni-yoni naei yun-junde inyaibonde me mokommile naeise melihau fele eranalene, reyae ewaeisi sele.

¹³ Rabuhine ban Allah yae Adamde bere mokouboke, nebeisa Hawa.

¹⁴ Nane merau Allahlena a ukeumire asasi koukoke kiyae Hawa yae, Adam mae ban.

¹⁵ Miyae maengke Wali Ondofolo Naei a elelere hila rabo halennele bele, ro miyaere kena buhae hemmile bele, nane merau Allah kena kole hului na wali haranaimilena, kelu omi hononate hee Allah nare hole moloumiyeumi.