Zaburey 95 - Songhai de Gao Bible

Irkoy saabuyan dooni

¹ Wa kaa, ir ma kaati nda ɲaali Abadantaa se, ir ma yafarhã ir hallasiroo Tondoo se!

² Ir ma koy kay jinoo ra nda albarka daŋyan, ir ma kaati nda ɲaali ka baytiyaŋ don a se!

³ Zama Abadantaa manʼti kala Koy beeri, Kokoy beeri no kaŋ goo koyey kul boŋ.

⁴ Laboo guusu beerey sii kala kaboo ra, tondi hondu boŋey manʼti kala nga wane.

⁵ Teekoo ti nga wane, nga kʼa tee, labu kogaa mo, nga kabey kʼa hanse.

⁶ Wa kaa, ir ma sujudu, ir ma gunguma, ir mʼir kanjey sonbu Abadantaa jine kaŋ nʼir tee.

⁷ Zama nga ti ir Koyoo, ir ti jamaa kaŋ a gʼa kur, alman kuroo kaŋ kaboo gʼa gongu. Hõ, nda war ga maa Irkoy jindoo,

⁸ war masi war biney šendandi sanda takaa kaŋ nda a teendi Meriba, sanda takaa kaŋ nda a teendi Masa zaaroo hane saajoo ra

⁹ kaŋ ra war baabey nʼay sii kʼay guna, ba kaŋ se i dii ay teegoyey.

¹⁰ Jiiri woytaaci (40) kaŋ zamanoo woo borey si kan ya ne, ay nee: «Jama no kaŋ biney dere, i sʼay fondawey bay.»

¹¹ Ay futuyanoo ra ay žee ka nee: «Abada i si huru ay hunanzamoo ra!»