Zaburey 79 - Songhai de Gao Bible

Izirayel Irkoy ŋaarayroo nga torraa waati

1 Woo ti Asaf zabur foo.

¹ Woo ti Asaf zabur foo. Ya Irkoy, dumiyaŋ na ni tuboo dii, i na ni hugu henanantaa žiibandi, i na Žerizalem tee tondi zuku.

² I na ni tamey bukawey nondi i ma tee ŋaayan beenaa cirawey se ka ni ganakey hamoo noo laboo adabbawey se.

³ I na ngi kurey doori sanda hari Žerizalem kuubi-ka-beraa bande, boro sii no kaŋ gʼi fiji.

⁴ Ir tee kaynahaya ir taalammey se, haarayhaya nda ɲooɲohaya borey se kaŋ gʼir kuubi ka bere.

⁵ Abadantaa, hala waati foo no ni futuroo kaŋ ga duumi ga ben ir bande? Hala waati foo no ni canseroo kaŋ ga tona sanda nuune ga ben ir bande?

⁶ Ni futuroo doori dumey boŋ kaŋ si ni bay, nda kokoytarawey boŋ kaŋ si ni maaɲoo cee.

⁷ Zama i na Yakuba borey gon ka ngi gorodogoo say.

⁸ Masi yee koyne ka hongu ir laybu bisantey! Yala ni tamallaa ma kaa nda cahãyan ka kay ir jine! Zama ir hanse ka kayna.

⁹ Ir faaba, ir Hallasikaa Irkoy, ni maaɲoo daržaa se! Ir kaa kabe ra, ir zunubey yaafa, ni maaɲoo sabbu se!

¹⁰ Macin se gandawey ga nee: «Man ngi Koyoo?» Yala ir jine gandawey ma bay kaŋ borey kaŋ na ni tamey kuroo mun, nʼga ngi kuroo alhakoo kaa i ra!

¹¹ Yala ma maa kasa-izey torrowey se! Ni kabe albarkantaa ma borey kaŋ i nʼi kayandi wiiyan se soolam.

¹² Ir Koyoo, ir taalamma gandawey kaŋ na ni kaynandi, i banandi hala cee iyye ngi kaynandiyanoo se.

¹³ Amma ir kaŋ ti ni jamaa nda ni alman kuroo kaŋ nʼga kur, ir ga albarka daŋ ma ne hala abada, zaman ka kaa zaman ir ga ni saaburoo šifa.