Zaburey 76 - Songhai de Gao Bible

Irkoy na wongoo benandi Siyoŋ koyraa ra

¹ Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Asaf zabur foo. Dooni.

² Žuda borey ga Irkoy bay, maaɲoo ga beeri Izirayel ra.

³ Nga tendaa sii kala Zalem, nga gorodogoo sii kala Siyoŋ.

⁴ Nongoo woo ra a na biraw-izey kaŋ ra nuune goo, nda koraa, nda takubaa nda wongoo say. Kay-kayna

⁵ Irkoy, darža nda beeray goo ni ga ka bisa tondi hondu kaŋ ra adabbawey goo kaŋ i gʼi hoo.

⁶ Gaabikoyney koonandi, i kaŋ jirbi ra, wongaari beerey kul albarkawey ben.

⁷ Yakuba Koyoo, waatoo kaŋ ni zahã i ga, bari kaarukey nda baryey kaŋ jirbi komante ra.

⁸ Ni hinne no ma hunburandi! May ma hin ka kay ni jine ni futuroo waati?

⁹ Ni goo beenaa ra nʼna ciitoo dunbu. Laboo hunbur, a tee suk

¹⁰ waatoo kaŋ Irkoy tun ka ciiti, nda ka laboo kul borey kaŋ ga taabi faaba. Kay-kayna

¹¹ Ba adamizey futuroo ga ni saabu. Borey kaŋ cindi futuroo banda ga, nʼgʼi tee ni gamahawoo.

¹² Wa meefur zaa Abadantaa, war Koyoo se, war mʼi kaa! Yala boro kul kaŋ gʼa kuubi kʼa bere ma gomniyaŋ noo Hunburandikaa se!

¹³ A ga boŋkoyney hunsaroo dunbu, hunburhaya no laboo kokoyey se.