Zaburey 61 - Songhai de Gao Bible

Irkoy ganakey ga talfi a ga

¹ Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Dawda zabur foo.

² Ya Irkoy, maa ay kaatoo se, haŋajer ay ŋaarayroo se!

³ Ay goo aduɲɲa boŋ faa ga, ay ga kaati ka ni cee, waati kaŋ ay binoo dunbu, mʼay ka koy tondoo boŋ kaŋ jer nda agay!

⁴ Zama ni ti nongoo kaŋ ra ay gʼay boŋ talfi, ni manʼti kala soorohugu kuku gaabante kaŋ ga kay agay iberoo jine.

⁵ Ay ga baa waati kul ya bara ni hukkumoo cire, ya duu lanbadoo ni fatawey cire. Kay-kayna

⁶ Zama ni, Irkoy, nʼga maa ay meefurey se, nʼnʼay noo tubuhayaa kaŋ nʼgʼa noo borey se kaŋ ga hunbur ni maaɲoo.

⁷ Han kuku tonton kokoyoo aloomuroo ga, yala nga jiirey ma kuu zaman nda zaman!

⁸ Yala a ma goro hala abada Irkoy jine! Naŋ ni borohennataraa nda ni laadirtaraa mʼa lakkal!

⁹ Ay si fay nda ka don ka ni maaɲoo saabu, zaari kul ay ga allaahidey kaa kaŋ ay nʼi zaa ma ne.