Zaburey 53 - Songhai de Gao Bible

Boro goo no kaŋ ga Irkoy ceeci wala?

¹ Donkey boŋkoynoo ka woo don. Dooni kaŋ bande laati goo. Woo ti Dawda bayti dooni foo.

² Lakkal jaŋantaa mma nee nga boŋ se kaŋ Irkoy si bara. I na goy laalayaŋ nda goy harramanteyaŋ tee, boro sii i ra kaŋ ga ihenna tee.

³ Irkoy goo beenaa ra, a ga fuuni ganda ka adamizey guna, ka dii wala boro goo i ra kaŋ goo nda lakkal henna, kaŋ ga Irkoy ceeci.

⁴ I kul hibi Irkoy ga, i tee boro laala, boro kul sii no kaŋ ga ihenna tee, ba affoo.

⁵ Wey kaŋ ga šerretaray jaŋay tee sii nda lakkal, ngi kaŋ ga ay jamaa ŋaa sanda ŋaayan, i si Irkoy wiri.

⁶ Woo ga, hunburay ga duu ey, bila addalil i ga hunbur. Boro kaŋ tun ma ne, Irkoy ga nga birey say-say. Nʼgʼi haawandi, zama Irkoy wanji i ga.

⁷ Nda a gar ba Siyoŋ koyraa ra Izirayel hallasiroo ga hun! Waati kaŋ Irkoy na nga jamaa misoo hanse, Yakuba ga ɲaali, Izirayel ga yafarhã.