Zaburey 48 - Songhai de Gao Bible

Kokoy beeroo koyraa

¹ Woo manʼti kala dooni. Woo ti Kora izey zabur foo.

² Abadantaa ga beeri, a ga hanse ka saabandi ir Koyoo koyraa ra, nga tondi hondoo ga henan.

³ Tondi henna no kaŋ ga tee ɲaali laboo kul se, Siyoŋ tondi hondoo kaŋ goo hawsa kunehere, Kokoy beeroo koyraa.

⁴ Koyraa kokoy hugey ra borey ga bay kaŋ Irkoy manʼti kala wakkalkaa.

⁵ Zama kokoyey na cere marga, i dira cere bande ka koy.

⁶ Za i dii a, nga no lakkaley tun, biney dunbu, i kul zuru!

⁷ No din i jijiri, ni mma nee woy kaŋ goo taamari kuuboo ra.

⁸ Ni mma nee dandi hewoo kaŋ ga harihii beerey kayri kaŋ ga koy Tarsis koyraa ra.

⁹ Woo kaŋ ir maarʼa, ir dii a Abadantaa, Aduɲɲakoyoo koyraa ra, ir Koyoo koyraa ra manʼti kala Irkoy ga koyraa tabatandi hala abada. Kay-kayna

¹⁰ Ya Irkoy, ni hugoo gundoo ra, ir ga hongu ni borohennataraa.

¹¹ Ya Irkoy, sanda ni maaɲoo, ni saaburoo ga harandi hala laboo kaydogoo ga, ni kabe gumaa ga too nda šerretaray.

¹² Siyoŋ tondi hondoo ma ɲaali, Žuda gandaa koyrawey ma yafarhã ni ciitey maaganda se.

¹³ Wa Siyoŋ kuubi, wʼa kuubi kʼa bere, wa nga soorohugu kukey kabu

¹⁴ ka nga cetewey guna ka boori, wa nga kokoy hugey laasaabu ka duu kʼa deede zamanoo kaŋ ga kaa borey se.

¹⁵ Koyoo woo ti ir Koyoo waati kul hala abada. Hala buuyan, nga, a gʼir gongu.