Zaburey 46 - Songhai de Gao Bible

Irkoy goo ir bande

¹ Donkey boŋkoynoo ka woo don. Woo ti Kora izey dooni foo. Dooni jinde buuna no.

² Irkoy ti nongoo kaŋ ra ir ga ir boŋ talfi, nga ti ir gaaboo, zarabiyaŋ ra, a gʼir faaba ka boori.

³ Woo se ir si hunbur ba nda laboo jijiri, ba nda tondi hondey ga sundu teekoo gamoo ra,

⁴ ba nda harey ga boosu i ga zarga ka tondi hondey jijirandi. Kay-kayna

⁵ Isa hari bisadogey ga Irkoy koyraa ɲaalandi, Koy Jerantaa gorodogey nongu henanantaa no.

⁶ Irkoy goo gundoo ra, koyraa si hun dogoo ra, za moo boo, Irkoy faabaroo ga kaa.

⁷ Gandawey ga kaati, kokoytarawey ga zinji-zinji, Irkoy jindoo fatta, laboo ga menne.

⁸ Abadantaa, Aduɲɲakoyoo goo ir bande, Yakuba Koyoo manʼti kala ir se wakkalkaw. Kay-kayna

⁹ Wa kaa ka dii Abadantaa teegoyey kaŋ ga hasaraw tee laboo ga!

¹⁰ A ga wongey kayandi hala aduɲɲa kaydogoo ga, a ga biraa kayri, a ga yaajoo say, a ga nuune daŋ bari torkawey ra.

¹¹ A nee: «Wa kay, war ma bay kaŋ agay ti Irkoy! Ay hinoo goo gandawey boŋ, a goo laboo boŋ.»

¹² Abadantaa, Aduɲɲakoyoo goo ir bande, Yakuba Koyoo manʼti kala ir se wakkalkaw. Kay-kayna