Zaburey 26 - Songhai de Gao Bible

Abadantaa, ay feeri

1 Woo ti Dawda zabur foo.

¹ Woo ti Dawda zabur foo. Abadantaa, ciiti ya ne, zama ay dira laadirtaray ra! Ay ga talfi Abadantaa ga, ay si hun ay dogoo ra.

² Abadantaa, ay tayni, ay sii, ay gundoo hayey nda ay binoo hayey kul guna ka boori,

³ zama ay ga ni borohennataraa bay, ay ga dira ka sawa nda ni cimoo.

⁴ Ya na goro zanbantey bande, ya na hanga almunafikey bande.

⁵ Ay ga konna goy futu teekey margaroo, ay si goro boro laaley bande.

⁶ Ay gʼay kabey ɲumay kʼay henanyanoo cebe, ay ga ni sargari tonadogoo kuubi kʼa bere, Abadantaa,

⁷ ka albarka daŋ ma ne ka ni teegoy kayfantey kul deede.

⁸ Abadantaa, nongoo kaŋ ra ni hugoo goo ga kan ya ne nongoo kaŋ ra ni daržaa goo.

⁹ Masi agay nda zunubantey tee affoo, masʼay hunaroo dii kuri munkey bande

¹⁰ kaŋyaŋ kabey na almunkar tee, ngi kabe gumaa ga too met nda sufurawey kaŋ i nʼi taa tuguyan ra.

¹¹ Agay, ay ga dira nda laadirtaray. Abadantaa, ay feeri, hinna ay ga!

¹² Ay ga dira fondo šerrantaa boŋ, margarey ra, ay ga albarka daŋ Abadantaa se.