Zaburey 149 - Songhai de Gao Bible

Abadantaa jamaa ga kan a se

¹ Aleluya! Wa dooni taaga don Abadantaa se! Wa nga saaburoo don nga ganakey jamaa ra!

² Yala Izirayel ma ɲaali nda nga Takakaa! Yala Siyoŋ koyraa izey ma yafarhã nda ngi kokoyoo!

³ I ma maaɲoo saabu nda gaaniyaŋ, i ma dunduŋ nda kuntiji hẽenandi a se!

⁴ Zama Abadantaa jamaa ga kan a se, a ga hallasiroo tee taalam borey se kaŋ ga taabi.

⁵ Yala nga ganakey ma ɲaali darža ra, i ma kaati nda ɲaali ngi kanidogey ra.

⁶ Yala Abadantaa saaburoo ma bara miɲey ra, de mo takuba mee hinkakoyni kaana ma bara kabey ra,

⁷ ka ngi boŋ faasa gandawey ra, ka jamawey noo ngi zukandoo,

⁸ ka ngi kokoyey haw nda gaala, ka ngi boro kayantey tefer nda guuru,

⁹ ka ciitoo tee i ga kaŋ hantumandi! Beeray beeri no Irkoy ganakey kul se. Aleluya!