Zaburey 147 - Songhai de Gao Bible

Abadantaa hinoo ga beeri

¹ Aleluya! Zama a ga boori boro ma don ir Koyoo maaɲoo se, a ga kan a ga boori boro mʼa saabu.

² Abadantaa ga Žerizalem cin koyne, a ga Izirayel borey kaŋ say-say marga.

³ A ga borey noo baani kaŋ biney hasara, a ga ngi dorey safar.

⁴ A ga handarawey hinnaa kabu, a ga affoo kul cee nda nga maaɲoo.

⁵ Ir Koyoo ga beeri, nga hinoo ga beeri, nga lakkaloo sii nda kaydoo.

⁶ Abadantaa ga talkey faaba, a ga boro laaley yeeti ganda.

⁷ Wa dooni don Abadantaa se nda albarka daŋyan, wa kuntiji kar ir Koyoo se!

⁸ A ga beenaa daabu nda duula, a ga ncirɲi soolu laboo se, a ga subu zayandi tondi hondey ra.

⁹ A ga adabbawey noo ŋaayan, a ga gaaru-gaaru-izey kaŋ ga kaati noo ŋaayan.

¹⁰ Bari gaaboo manʼti baffoo a se, a si kabu boro gaaboo ga.

¹¹ Borey kaŋ ga hunbur Abadantaa ga kan a se, borey kaŋ ga naata nga borohennataraa ga.

¹² Žerizalem, ma Abadantaa šifa! Siyoŋ koyraa, ma ni Koyoo saabu,

¹³ zama a ga ni koyraa miɲey ganbey kufaley noo gaabi, a ga albarka daŋ ni izey ra ni gundoo ra.

¹⁴ A ga alaafiya tabatandi ni gandaa ra, a ga ni kungandi nda alkama henna.

¹⁵ A ga nga yaamarey sanba laboo ga, nga meešennoo ga zuru nda cahãyan.

¹⁶ A ga neeži zumandi sanda haabu, a ga harandaŋ doori sanda boosu.

¹⁷ A ga nga galašoo tee kunturu-izeyaŋ kʼi warra, may no ma hin ka kay nga yaynoo jine?

¹⁸ A ga nga meešennoo sanba kʼi mennandi, a ga nga hewoo funsu, de harey ga doo.

¹⁹ A ga nga šenney har Yakuba se, ka nga hantumey nda nga hantumey kaŋ kayandi har Izirayel se.

²⁰ A mana takaa follokaa tee gandawey kul se, i si nga hantumey kaŋ kayandi bay. Aleluya!