Zaburey 146 - Songhai de Gao Bible

Abadantaa ga yalaafantey faaba

¹ Aleluya! Ay hundoo, ma Abadantaa saabu!

² Kullihinne ay ga huna ay ga Abadantaa saabu, ay ga don ay Koyoo se kullihinne ay ga bara.

³ War masi war naanaa daŋ boŋkoyney ra, adamize ra kaŋ si hin ka boro hallasi.

⁴ Hundoo ga hun, a ga willi nga laboo ra, zaari follokaa ra nga tammahãwey ga dere.

⁵ Boraa duu gomni kaŋ Yakuba Koyoo ti nga faabakaa, kaŋ naataa goo Abadantaa, nga Koyoo ra.

⁶ Nga kaŋ na beenaa nda laboo tee, nda teekoo nda haya kul kaŋ goo a ra, nga kaŋ ga laadir hala abada.

⁷ A ga ciiti dunbu borey kaŋ ga kankam se, a ga heraykoyney noo ŋaayan, Abadantaa ga kasa-izey feeri.

⁸ Abadantaa ga danawey moɲey feeri, Abadantaa ga borey kaŋ ga golbi kayandi, Abadantaa ga baa boro šerrantey.

⁹ Abadantaa ga yawey hawgay, a ga alyatimoo nda woyoo kaŋ kurɲoo buu faaba, amma a ga boro laala dabarey hasara.

¹⁰ Abadantaa ga laama hala abada, Siyoŋ koyraa, ni Koyoo ga laama zaman ka koy zaman! Aleluya!