Zaburey 140 - Songhai de Gao Bible

Ay feeri kʼay kaa boro laala ra

¹ Donkey boŋkoynoo ka woo don. Woo ti Dawda zabur foo.

² Abadantaa, ay feeri kʼay kaa boro laala ra, ay dii ka hun boro futu ga.

³ I ga dabari laalayaŋ soolu ngi biney ra, zaari kul wongu no i ga ceeci.

⁴ I ga ngi deeney kaanandi sanda gondi, gandakarfu naaji bara miɲey ra. Kay-kayna

⁵ Abadantaa, ay lakkal ya si kaŋ boro laala kaboo ra. Ay dii ka hun boro futu ga kaŋ gʼay kaŋyanoo miile.

⁶ Boro binebeeriyaŋ tugu ka kumsay hirri ya ne kʼay haw nda karfu, i ga filijiyaŋ daŋ ya ne fondaa bande, i ga sankay hirri ya ne. Kay-kayna

⁷ Ay nee Abadantaa se: «Ni ti ay Koyoo! Abadantaa, haŋajer ay suurandiyaney se.

⁸ Abadantaa, ay Koyoo, ay hallasiroo gaaboo, nʼgʼay boŋoo daabu han kaŋ i na wongu jinay zaa.

⁹ Abadantaa, masi boro laala noo hayey kaŋ a gʼi wiri, masi naŋ hayaa kaŋ a ga baa nga mʼa tee ma boori hala a masi nga boŋ jer.» Kay-kayna

¹⁰ Borey kaŋ gʼay kuubi kʼay bere, yala bonaa kaŋ miɲey nʼa soolu ma gum i boŋ.

¹¹ Yala denji ciray ma doorandi i boŋ, yala Irkoy mʼi kaŋandi nuunaa ra, guusu beeri ra kaŋ ra i si tun koyne.

¹² Deene-kaana si tee haya laboo ga, boro futu, bone si hun a bande.

¹³ Ay ga bay kaŋ Abadantaa ga ciiti boro se kaŋ ga taabi, a ga farakoyney noo ngi cimoo.

¹⁴ Nda cimi, boro šerrantey ga ni maaɲoo šifa, boro bine šerrantey ga kaa ka goro ni jinoo ra.