Zaburey 121 - Songhai de Gao Bible

Irkoy ti faabakaa

1 Woo ti žigiyanoo dooni foo.

¹ Woo ti žigiyanoo dooni foo. Ay gʼay moɲey jer tondi hondey here. Man ra faabari ga hun ya ne?

² Faabaroo si hun ya ne kala Abadantaa do kaŋ na beenaa nda laboo tee.

³ A si naŋ ni cewey ma tanši, ni lakkalkaa si dusungu.

⁴ Guna, Izirayel lakkalkaa, a si dusungu, a si jirbi.

⁵ Abadantaa ga ni lakkal, Abadantaa ti biyoo kaŋ goo ni kabe gumaa ga.

⁶ Zaari here, waynaa si ni kar, cijin here, handoo si ni kar.

⁷ Abadantaa ga ni lakkal ka hun ifutu kul ra, a ga ni hunaroo lakkal.

⁸ Abadantaa ga ni lakkal waati kaŋ nʼga fatta nda waati kaŋ nʼga willi kate, za sohõ da hala abada.