Zaburey 112 - Songhai de Gao Bible

Albarka goo Abadantaa hunburkaw ga

¹ Aleluya! Boraa duu gomni kaŋ ga hunbur Abadantaa, kaŋ nga yaamarey ga kan a se.

² Nga hayroo ga tee boro kayante gandaa ra, zama boro šerrante hayroo ga duu albarka.

³ Alman nda haya henna goo nga hugoo ra, nga šerretaraa ga cindi hala abada.

⁴ Gaay ga fatta kubaa ra boro šerrantey se kaŋyaŋ ga alhormo tee, i ga tamalla, i ga šerre.

⁵ A ga boori boro ma alhormo tee, a ma garaw boro se, a ma nga almušakkawey tee ka sawa nda cimoo.

⁶ Zama a si tatanji abada. Boro ga hongu boro šerrante waati kul.

⁷ A si hunbur alhabar futu, binoo ga kani, nga naanaa goo Abadantaa ra.

⁸ Binoo ga kani dabay, a si hunbur, nga nkuwawey ga kaa ka tee a se gunahaya.

⁹ Boro kaŋ ga talkey noo ka gomni doori i boŋ, nga šerretaraa ga cindi hala abada. Nga gaaboo ga tonton nda darža.

¹⁰ Boro futu ga dii a, a si kan a se, a ga hiɲey kaama, a ga halaci. Boro futu ibaayoo ga dere.