Zaburey 111 - Songhai de Gao Bible

Abadantaa hunburaa ti lakkal šintinoo

¹ Aleluya! Ay ga Abadantaa šifa nda ay binoo kul, boro šerrantey nda jamaa margaroo ra.

² Abadantaa teegoyey ga beeri, borey kaŋ se i ga kan gʼi ceeci.

³ Nga teegoyoo ga nga daržaa nda nga annuuraa cebe, nga šerretaraa ga cindi abada.

⁴ A na taka tee borey ma hongu nga kayfey, Abadantaa ga alhormo tee, a ga tamalla.

⁵ A na ŋaayan noo borey se kaŋ ga hunbur a, a ga hongu nga amaanaa hala abada.

⁶ A na nga teegoyey ka nga hinoo cebe nga jamaa se, kʼi noo gandawey sanda tubu.

⁷ Nga kabe teegoyey ga laadir i ga šerre. Naanay goo hayey kul ga kaŋ a nʼi har,

⁸ waati kul, abada i si tun, i teendi nda laadirtaray nda šerretaray.

⁹ A na nga jamaa feeri, a na nga amaanaa gorandi hala abada. Nga maaɲoo ga henan, a ga hunburandi.

¹⁰ Ka hunbur Abadantaa ti lakkal šintinoo, boro kaŋ ga nga yaamarey dii ga duu lakkal henna. Nga saaburoo ga bara hala abada.