Zaburey 101 - Songhai de Gao Bible

Kokoy ga allaahidu zaa kaŋ nga ga laama nda cimi

1 Woo ti Dawda zabur foo.

¹ Woo ti Dawda zabur foo. Ay ga don ka borohennataray nda cimi har. Abadantaa, ni se ay ga don.

² Ay ga gaabandi ka dira fondo šerrante ra. Waati foo no nʼga kaa ay do? Ay ga dira nda bine henanante ay borey game.

³ Ay si haya futu kul daŋ ay moɲey cire. Ay ga konna teegoy laaley kaŋ borey kaŋ hun fondaa boŋ gʼi tee, i masi man agay.

⁴ Bine šiira ga mooru ay ga, ay si ifutu bay.

⁵ Boro kul kaŋ na nga cinaa maaɲoo hasara tuguyan ra, ay ga koyoo halaci. Fooma nda binebeeray, ay sʼi muɲe.

⁶ Ay ga lakkal daŋ gandaa boro laadirantey se hala i ma goro ay jere, boro kaŋ ga dira fondo šerrante ga, nga no ma goy ya ne.

⁷ Zanbante si goro ay hugoo ra. Taariharkaw si kay ay jine.

⁸ Subbaahi kul ay ga gandaa boro laaley kul halaci, ka borey kul kaŋ ga šerretaray jaŋay tee kaa Abadantaa koyraa ra.