Ayuba 35 - Songhai de Gao Bible

Cee hinzantoo kaŋ Elihu na šennoo zaa

¹ Elihu na šennoo zaa ka nee:

² «Nʼga hongu ni goo nda cimi ka nee: ‹Ay ga šerre ka bisa Irkoy.›

³ Zama ni nee Irkoy se: ‹Man ni nafaa ya si zunubu tee, macin no a gʼa hanse ya ne?›

⁴ Agay no ma ni zaabi, ni nda ni cerey kaŋ goo ni bande.

⁵ Beenaa honnay, guna! Duulawey guna, takaa kaŋ nda i ga mooru ni ga.

⁶ Nda nʼna zunubu tee, cin no nʼgʼa hasara a se? Nda ni hooyaney boobo, macin ti tooɲaa kaŋ nʼnʼa tee a se?

⁷ Nda boro šerrante ti ni, macin ti nafaa kaŋ ga hun a se ni do? Macin no a ga duu a ni ga?

⁸ Ni borolaalataraa si hin ka haya hasara kala ni cine se, šerretaraa si haya hanse kala adamize se.

⁹ Borey ga kaati ngi kankamyan boobey se, borey ga faabayan ceeci ka ngi kaa boŋkoyney hini futaa cire.

¹⁰ Amma boro kul si nee: ‹Man Irkoy kaŋ nʼay taka? Nga kaŋ ga baytiyaŋ zumandi boro ga cijin here a mʼi don,

¹¹ nga kaŋ gʼir cawandi ka bisa laboo adabbawey, nga kaŋ gʼir noo lakkal ka bisa beenaa cirawey?›

¹² Borey ga kaati, amma Irkoy si tuuru i se, boro laaley foomayanoo maaganda se.

¹³ Cimi no, i mma kaati yaada, Irkoy si haŋajer i se, Hini-kul-koyoo si dii a.

¹⁴ Amma ni ka nee kaŋ nʼsi dii a, ni misoo goo a jine, a batu!

¹⁵ Hala sohõ a mana nga futuroo cebe, ni mma nee kaŋ a nka dirɲa tureyan boobey.

¹⁶ Šenni yaadayaŋ no Ayuba ga nga miɲoo feeri kʼi har, a ga lakkal jaŋante šenni booboyaŋ har.»