Ayuba 28 - Songhai de Gao Bible

¹ «Cimi no, nongu goo no kaŋ ra nzorfu kaaray ga hun, nda nongu kaŋ ra wura ga ɲumay ka henan,

² Guuru bibi si hun kala laboo ra, tondi mennante ga alhan noo.

³ Kubawey ga ben, i ga laboo fanši ka koy guusu kuku ra hala tondey kaŋ ga tugu buuyan biyoo ra.

⁴ I ga guusu fanši kaŋ ga mooru borey gorodogoo, nongu ra kaŋ ra cee si duu jisidoo, i nka deeja, i ga zinji-zinji adamizey se nongu mooro.

⁵ Laboo kaŋ ra meehunay ga hun gandaheroo bere-bere sanda nuune ka duu a.

⁶ Safir tondi si duwandi kala laboo tondey ra, no din ra wura hamni ga duwandi.

⁷ Ciraw kaŋ ga hoo si fondaa bay, algabu biboo moɲey si dii a.

⁸ Ganjihooga kaŋ ga zankam mana too no din, ganjihayla mana bay ka bisa nda no din.

⁹ Adamize ga kaŋ tondi ga, a ga tondi hondey bere hala ngi linjey ga.

¹⁰ A ga guusu kaa tondey ra kʼa tee hari bisadoo, moɲey ga dii haya kayante dumi kul.

¹¹ A ga haroo kayandi hala a masi dandi, a ga haya tugantey fatawandi.

¹² Amma man ra lakkal ga duwandi? Man ra fahamay doo goo?

¹³ Adamize si alkadaroo bay, a si duwandi hundikoyney laboo ga.

¹⁴ Guusu beeroo nee: ‹A sii ay ra.› Teekoo nee: ‹A sii ay do.›

¹⁵ Ba wura alhakiika sʼa noo boro se, nzorfu kaaray si duu a.

¹⁶ A si hin ka neešandi Ofir gandaa wura bande, oniks tondi hay šenda si duu a, safir tondi hay šenda si duu a.

¹⁷ Wura wala diji si hin ka deedandi a ga, a si hin ka barmayandi nda wura alhakiika jinay.

¹⁸ Hiiri caadante nda murmur si hin ka kay a jine, lakkal hayoo bisa alyakuutu.

¹⁹ Topaz tondi kaŋ hun Ecopi gandaa ra si hin ka deedandi a ga, wura alhakiika si toorʼa alkadar.

²⁰ Man ra lakkal ga hun? Man ra fahamay dogoo goo?

²¹ A tugandi hundikoyni kul se, a daabandi beenaa cirawey se.

²² Guusu futaa nda buuyanoo šelaŋ ka nee: ‹Ir haŋawey maa nga šennoo.›

²³ Irkoy no ma lakkal fondaa bay, nga no ma dogoo bay,

²⁴ zama nga no ma dii hala laboo kaydogoo ga, a ga dii haya kul kaŋ goo beenaa cire.

²⁵ Nga no ka hewoo hinoo daŋ, nga no ma harey neeši.

²⁶ Waati kaŋ a na yaamar noo ncirɲoo se, ka fondo tee meli nda jiŋjiŋyan se,

²⁷ waatoo din a dii lakkal, a nʼa deede, a nʼa laasaabu, a nʼa noo alkadar.

²⁸ Woo banda ga, a nee adamize se: ‹Ka hunbur war Koyoo, woo ti lakkal, ka mooru ifutu, woo ti fahamay!›»