YESAYA 15 - Sura' Madatu

Pa’nubua’ diona Moab 15:1–16:14

¹ Inde sia tu kada Napa’petanggungan Puang Matua diona Moab. Manassa bonginna anna disanggang sia disabu’i tu Ar-Moab; bonginna duka anna disanggang sia disabu’i tu Kir-Moab.

² Male tu tau langngan banua kapemalaran, to Dibon male langngan inan madao la sibatingan. Dao Nebo sia Medeba nanii to Moab siurrukan; iatu ulunna tau iato mai digalettungi nasang sia diku’ku’i tu danggo’na.

³ Dio lu tutu lalanna lumomban tu tau iato mai ma’pote dibolong; dao lu mintu’ bubungan sia lan lu pasa’na nanii duka tau iato mai sitangiran sia umpendio’ uai matanna.

⁴ Siurrukan tu to Hesbon sia to Eleale; dirangi tu gamaranna sae lako Yahas, ondongpi tu surodadunna to Moab, silallakan sia ranggang tu penaanna.

⁵ Iatu penaangku untangi’i Moab; iatu to mallainna ullambi’mo Zoar, Eglat-Selisia; sia tuka’mo langngan tanete Luhit situang uai mata, sia silallakan dio lalan lako Horonaim belanna kamandasan.

⁶ Mempadang lo’bangmo tu randananna salu Nimrim, belanna mampu’ nasangmo tu riunna, sia malayu tu mai tananan, tae’ bangmo mamata.

⁷ Iamoto anna iatu ianan napakombong sia nananna napallaian lian salu Ra’de.

⁸ Belanna iatu urruk silelemo lan lili’na Moab, sia iatu batingna dirangi sae lako Eglaim, sia sae lako Beer-Elim dirangi tu tangi’na.

⁹ Saba’mi rara tu uai salu Dibon, apa la Kuparampoi pole’ mandunna tu Dibon: iamotu singa la ullaoi mintu’ to Moab umpallaian kalena sia mintu’ pa’tondokan torronapa.