YESAYA 12 - Sura' Madatu

Nanian pa’kurre sumangasanna to tilendokmo 12:1-6

¹ Allo iato la ma’kadako mukua: La kupudi-pudikomi, o PUANG, belanna moi amMi sengkeina’, apa meremo tu sengkeMi, Mipakatanamo’.

² Inang Puang Matua tu oto’na kamakarimmanangku, marannuna’, sia tae’ kumataku’, belanna PUANG PUANG tu oto’na kamatotorangku sia pa’pudiangku sia Iamo kupomakarimman.

³ Sia la parannu paimankomi untimba uai dio mai bubun kamakarimmanan.

⁴ Pudimi tu PUANG, sia meongli’komi ussa’bu’ sanganNa, pakaleleanni tu penggauranNa dio lu mintu’ bangsa, pa’peissananni, kumua matande tu sanganNa.

⁵ Pakendekanni pa’pudian tu PUANG, belanna umpogau’ apa kalle-kallean. Pa’peissanan nasangi te iannate lako mintu’ lino.

⁶ Unnarrakkomi sia sumapukokomi, e pa’tondokan Sion, belanna iatu To maserona to Israel pasareongan illan tangngami.