PA’PUDIAN 98 - Sura' Madatu

Attu kasalamaranna to Israel 98:1-9

¹ Pa’pudian. Penanianni misa’ nanian ba’ru tu PUANG, belanna mangkamo umpogau’ apa kalle-kallean, lima kananNa sia takia’ maindanNa umpadenanni kapataloan.

² Na’pa’peissanammo PUANG tu kasalamaran lu dio mai Kalena, sia umpaombo’ kamaloloanNa dio tingayona mintu’ bangsa.

³ Nakilalai tu kamasokananNa, sia kamarurusanNa lako bati’na Israel, mintu’ duka lelean uran untiromo kamakarimmanan lu dio mai Kapenombanta.

⁴ Pela’tekanni tu PUANG, e mintu’ banne lino, ra’ban-ra’bankomi sia unnangnga’komi, sia pakendekkomi pa’pudian.

⁵ Pakendekanni pa’pudian tu PUANG dipasiala katapi, pasialai katapi sia ma’bare-bareankomi.

⁶ Sia naturu’ tarompe’ sia tarompe’ pua; unnarrakkomi dio oloNa Datu, iamotu PUANG.

⁷ La mongngo’ tu tasik sola mintu’ issinna, sia lino sola mintu’ untongkonninnai.

⁸ Mintu’ salu la massala’pa-la’pa, sia mintu’ buntu la siangngaran.

⁹ Dio oloNa PUANG, belanna la sae umpaolai salu tu lino; anNa tang pakayun bimbang umpaolai salunna te lipu daenan, sia iatu mintu’ bangsa sitinayanna.