PA’PUDIAN 95 - Sura' Madatu

Sipatu takasiri’ tu Puang Matua sia tapengkaolai 95:1-11

¹ Maikomi tara’ban-ra’ban umpenanian PUANG, anta unnarrak umpudi buntu batu oto’na kasalamaranta.

² Maikomi anta ma’kurre sumanga’ umpennoloi oloNa, sia mela’tek umpakendekanni pa’pudian.

³ Belanna iatu PUANG iamo Kapenomban mala’bi’, sia iamo Datu kapua, tu untongloi mintu’ deata!

⁴ Iatu mintu’ liku mandalan lan nasang lisu pala’Na, sia Ia ampunna mintu’ bottona buntu.

⁵ Ia puangna tasik, belanna Ia ungkombongi, Ia duka tu kapadanganna, panggaraga limanNa.

⁶ Maikomi anta tukku menomba, anta malinguntu’ dio oloNa PUANG, Totumampata.

⁷ Belanna iamo Kapenombanta. Sia kita tu bangsa nakambi’, sia domba Napelisu pala’. Melo kemiperangii tu gamaranNa te allo totemo!

⁸ Da mipamakarra’i tu penaammi, susi tonna dio Meriba, sia susi tonna allo Masah dio padang pangallaran.

⁹ Tonna sandakNa’ to dolomi. Sia nasudiNa’, moi anna ta’paimi matanna tu mintu’ penggaurangKu.

¹⁰ Patangpulo taunna nanii umpa’di’i penaangKu tu to tama bilangan iato. Kukuami: Tau iato mai misa’ bangsa pusa tu penaanna, tu tang untandai lalanKu.

¹¹ Iamoto angKu palenduranni kada kumua: Inang tae’ nala tama kapelayoangKu tu tau iato.