PA’PUDIAN 89 - Sura' Madatu

Tang tontongraka pangallu’Na Puang Matua lako Daud? 89:1-53

¹ Misa’ gelong bangunan ada’na Etan, to Ezrahi.

² La tontongna’ sae lakona umpopenanian tanda mamaseNa PUANG, sia iatu kamarurusamMi napa’peissanan tongka’ dililaku landa’ lako disituran-turananni.

³ Belanna susimoto tu kadangku: Iatu kamasokanan tontong bang dibangun, iatu kamarurusamMi ten langi’ tang tiberu.

⁴ Nakua kadamMi: MangkaMo’ sibasse to Kupilei langsa’, sia basse Kupaallonni sumpa lako Daud, taungKu:

⁵ Tang la Kuparoto’ tu bati’mu sae lakona, sia la Kubangun tu kambuno kapayungammu landa’ lako disituran-turananni. Sela

⁶ Iamoto anna mintu’ tu daona langi’ umpudi penggauran kalle-kalleamMi, o PUANG, sia kamarurusamMi dipudi lan kombonganna to masallo’.

⁷ Belanna mindara lan ba’tangna langi’ tu ma’din la dipasitenderan PUANG? Sia mindara tu mai disanga pekapuangan tu la sitinti batunna PUANG?

⁸ Iamotu Kapenomban metakuran tongan lan tinimbunna to masallo’, sia lendu’ nakataku’na mintu’ to untalimbungi.

⁹ O PUANG, Kapenombanna mintu’ ma’dandan maritik, mindara tu sumpu kuasa susi Kamu, o PUANG? Iatu kamarurusamMi untalimbung tamaKomi.

¹⁰ Kamumo tu umparenta mariakna tasik, Iake umbassan lenni tu bombangna, Kamuri tu umparadanni.

¹¹ Mangkamo Miratoi tu Rahab butung to dipatei, sia mangka Mipasisarak-sarak lima mawatangMi tu ualimMi.

¹² Kamumo puangna langi’ sia Kamu duka puangna lipu daenan; iatu lino sola mintu’ issinna, Kamumo unnotonni tu parandanganna.

¹³ Iatu ulunna salu kalua’ sola pollo’na uai Kamu umpadenni: Iatu buntu Tabor sola Hermon mela’tek tete dio sangamMi.

¹⁴ Kamumo tu ma’takia’ bassi. Mawatang tu limamMi, sia matande tu lima kananMi.

¹⁵ Iatu kamaloloan sia tang pakayun bimbang iamo parandanganna isungan kapayungamMi, na iatu kamasokanan sia kamarurusan dolo dio oloMi.

¹⁶ Maupa’ tu bangsa unnissanNi mela’tek tanda kasendean, tau iato mai lolang naarrangi rupamMi, o PUANG;

¹⁷ Tu belanna sangamMi anna mela’tek tu tau iato mai kiallo-kiallo, sia tete dio kamaloloamMi anna dipamatande.

¹⁸ Belanna Kamuri tu napomala’bi’ kamatotoranna, sia diona kamasorokamMi amMi pataranggai tu tandukki.

¹⁹ Belanna iatu balulangki lu dio mai PUANG, sia iatu datungki lu dio mai To maserona to Israel.

²⁰ Tonna attu iato ma’kadamoKomi lako to masallo’Mi lan patiro mendeata, susite: Mangkamo Kulampakan pa’tunduan tu misa’ lalong, sia Kupamatandemo tu misa’ to dipilei langsa’ lan mai bangsa iato.

²¹ Kuappa’mo tu Daud, taungKu, sia Kutokko minna’ maseroKu.

²² Natontong ussande’i limangKu, sia anna pabantang takia’Ku:

²³ Tae’ anna la ullaoi uali, sia tae’ anna la umpandasai to bulituk.

²⁴ Sangadinna la Kupipping tu ualinna dio olona, sia la Kutalo tu mai to ungkabiri’i.

²⁵ La narondong kamarurusangKu sia kamasokanangKu, sia tete dio sangangKu anna dipatarangga tu tandukna:

²⁶ La Kupaalai limanna tu tasik, sia lima kananna tu mai minanga.

²⁷ La ma’kada lako Kaleku kumua: Kamumo tu Ambe’ku, Kapenombangku sia buntu batu kasalamarangku.

²⁸ La Kupatongkon anak pa’bunga’ duka, untongloi mintu’ datu lan te lino.

²⁹ La Kukaduttu’ tu kamasokanangKu lako kalena tontong sae lakona, sia iatu basseKu sola tang la tileluk:

³⁰ La Kupamasae lako tu tarukna, sia iatu kambuno kapayunganna sipuli langi’.

³¹ Iake naboko’i bati’na tu Sukaran alukKu, sia tae’ anna karitutui tu atorangKu,

³² Iake natengkai tu Kupondokna, sia tae’ nakaritutui tu pepasanKu.

³³ Manassa la Kupapakkanni pebamba tu salana, sia la Kupapakkanni parri’ tu kakadakeanna.

³⁴ Apa tae’ angKu tang umbenni kamasokanangKu, sia iatu kamarurusangKu tae’ angKu la urriu’ sulei.

³⁵ Tae’ angKu la umpamatuna basseKu, sia tae’ angKu sondai tu kada sunmo dio randan pudukKu.

³⁶ PissanKu umposumpa kamaseroangKu: Tae’ Kula ungkamorangi len Daud!

³⁷ La tontong masae lako tu tarukna, sia iatu kambuno kapayunganna butung matanna allo dio oloKu.

³⁸ La tulangdan tang tiberu tontong sae lakona butung bulan, sia iatu sa’bi dao langi’ tang leluk. Sela

³⁹ Moi anna susito, mangkamo Misuale sia tang Mibilangmo, sia sengkemoKomi lako to Mitokko.

⁴⁰ Mangkamo Mipoka tu basseMi sola taumMi, sia Mipamatunamo tu makotana naurunganni ronno’ sala rokko padang.

⁴¹ Mintu’ benteng batunna Misaeran, sia mintu’ tambakukunna Misanggang.

⁴² Mintu’ to unnolai lalan iato, umpangrampai, sia kadibelleran lako sangbanuanna:

⁴³ Mipamatandemo tu lima kananna balinna, sia Mipasendemo tu mintu’ ualinna.

⁴⁴ Sia Mipatibalikmo tu mata la’bo’na lako kalena, sia tang Mieloran parrang lan tananan ra’.

⁴⁵ Mipapa’demo tu arrangna, sia Misongkan rokko padang tu isunganna.

⁴⁶ Mipamadoi’ bangmo matua, sia Mipakabu’imo siri’. Sela

⁴⁷ O PUANG, sangapapoKomi la tontong bang membuni, sia sangapapi la dukku susi api tu kasengkeamMi?

⁴⁸ Kilalai kumua tumba madenge’na tu sunga’ku, tumba torro salana tu kaungkombongamMi rupa tau?

⁴⁹ Mindara tu tolino tang sitiro kamatean, sia ma’din urrampanan kalena, dio mai kuasanna lino to mate? Sela

⁵⁰ O Puang, umbamira tu mintu’ kamasokanamMi pirambongi’, tu mangka Mialluran Daud, Mipasiindo’ sumpa diona kamarurusamMi?

⁵¹ O Puang, kilalai tu mintu’ napomatunanna tu mai taumMi, tumba ia kupatarinna lan ba’tengku (tu pebe’se) dio mai mintu’ bangsa kapua.

⁵² Iamotu pa’be’sena mintu’ ualimMi, o PUANG, tu umbe’se mintu’ tengkana to Mitokko!

⁵³ Mintu’na kadipudian lu lako nasang PUANG tontong sae lakona! Amin, ya amin.