PA’PUDIAN 88 - Sura' Madatu

Passambayangna to naala saki tang dampi-dampian 88:1-19

¹ Misa’ nanian pa’pudianna bati’na Korah. Lu lakona pangala sengo. Unturu’ baenan sengo: Mahalat Leanot, Misa’ gelong bangunan ada’na Heman, to Ezrahi.

² O PUANG, Puang Matua oto’na kasalamarangku, meongli’na’ mati’ oloMi allo bongi.

³ Sangapaoi anna lattu’ mati’ oloMi tu passambayangku, tananni talinga tu pengkamoyaku:

⁴ Belanna namossongmo parri’ tu penaangku, sia merreke’mo lako lino to mate tu sunga’ku.

⁵ Iatu aku te naalana’ bilanganna to la tama tang merambu, sia susimo’ to tang panggega’.

⁶ Sumpandanmo’ sola to mate, butung to mate dipongko tungngara lan tang merambu, tu tae’mo Mikilalai lenni, sia iatu tisabak ka’tu lan mai lisu pala’Mi.

⁷ Mipalendu’ rokkonamo’ pa’tambunan, diong malillinna sia mandalanna.

⁸ Tarru’ nao’tonna’ kasengkeamMi, sia Mipasamboina’ bombangMi. Sela

⁹ Mipatoyangmo dio mai kaleku tu mai sitandangku, sia Mipatulangdanmo’ napomagalli tau iato mai; tikurungmo’ sia tae’mo kubelai lelo.

¹⁰ Iatu matangku maku’dung napobua’ kamandasan, o PUANG, kiallo-kiallo meongli’na’ Mati’, sia umpatadona’ pala’ku mati’ Kalemi.

¹¹ Ma’dinroKomika umpogau’ kalle-kallean lako to mate; sia ma’dinraka tu bombo to mate malimbangun la umpudiKomi?

¹² Ma’dinraka tu kamasokanamMi napa’peissanan tau diong pa’tambunan, ba’tu iatu kamarurusamMi diong inan dinii ponnong?

¹³ Ma’dinraka tu mintu’ penggauran kalle-kalleanMi naissan tau lan lu kamalillinan? Sia iatu kamaloloamMi dio tana dinii tang mangingaran?

¹⁴ Apa iatu aku te meongli’na’ Mati’, o PUANG, sia iake melambi’ la kendek tu passambayangku mati’ oloMi.

¹⁵ O PUANG, apara bannangna amMi tibera’, sia Mibunianna’ lindoMi?

¹⁶ Iate aku te mandasana’ tempon dio mai mangurangku, takua to la matemo’, kuperasai tu penggauran masangMi sia ka’tu rannuna’.

¹⁷ Iatu kare’dekanna ara’Mi ussamboina’, sia mintu’ penggauran masangMi ussolangina’;

¹⁸ kiallo-kiallo iatu mintu’nato napatama limbuna’ ten to uai, pada nasiputu’i tamana’.

¹⁹ Mintu’ sangmuaneku sia to kusibaan Mipatoyangmo dio mai kaleku; iatu sitandangku poton tama kamalillinan.