PA’PUDIAN 84 - Sura' Madatu

Nanian to lumio’ umpangudui Yerusalem 84:1-13

¹ Lu lakona pangala sengo. Unturu’ baenan sengo: Gitit. Pa’pudianna bati’na Korah.

² Tangpada mala’bi’na tu banuamMi, o PUANGna mintu’ ma’dandan maritik!

³ Mamali’ tu penaangku sia mangussu’ la mentama tarampakNa PUANG; deatangku sia batang kaleku mela’tek umpudi Puang Matua matontongan.

⁴ Ia duka tu dena’ ungkabu’tuimo inan nanii, sia iatu kaluppini’ den serangna, napannai anakna, sikandappi’ inan pemalaran lako Kalemi. O PUANGna mintu’ ma’dandan maritik, o Datungku sia Kapenombangku.

⁵ Maupa’ tu mintu’ to tonang lan banuamMi: tang toreKomi napudi! Sela

⁶ Maupa’ tu to umpopamuntuKomi, tu to marampa’mo lan penaanna tu lalan.

⁷ Iake unnolai lombok rangke natuoi tallubeke, nabilang kumua padang nasitutu’i kalimbuang boba, sia nasakka’i rongko’ bunga’ uran.

⁸ Samambelanna naola, sabatta’-batta’na, la umpennoloi Puang Matua dio Sion.

⁹ O PUANG, Kapenombanna mintu’ ma’dandan maritik, perangii tu passambayangku, patananni tu talingamMi, o Kapenombanna Yakub! Sela

¹⁰ O Puang Matua, balulang toto’ki, tiroi sia mantai tu rupanna to ditokkoMi.

¹¹ Belanna sangallo dio to’ tarampakMi melo ia anna sangsa’bu allona (dio inan senga’); mandu kuporai untorroi to’ ba’ba banuanNa Kapenombangku na iatu torro lan tendana to tang mekaaluk.

¹² Belanna PUANG Kapenomban, iamo matanna allo sia balulang toto’, sia PUANG umpa’ben pa’kamase sia kamala’biran; sia tae’ duka kameloan tang Naben to lolang malambu’.

¹³ O PUANGna mintu’ ma’dandan maritik, maupa’ tu to umposande’Komi.