PA’PUDIAN 83 - Sura' Madatu

Passambayang malaku pa’tunduan unnea mintu’ ualinna Israel 83:1-19

¹ Nanian. Pa’pudianna Asaf.

² O Puang Matua, da Mimari’pi bang, sia da Mima’pakappa sia da Mima’bituk-bituk, o Puang Matua.

³ Belanna tiromi, marukka nasangmo tu mintu’ ualimMi, sia mintu’ to ungkabiri’Komi umbangunan ulunna.

⁴ Sama turu’ untannun tangnga’ kadake unnea taumMi, sia sipakulu-kulumo la umbali mintu’ to tang Mipairi’i angin.

⁵ Nakua kadanna: Maikomi anta sabu’i nasangi tu tau iato, da nadadi len misa’ bangsa, sia da nadikilalai lenpa tu sanganna Israel!

⁶ Inang manassa misa’ penaamo tu tau iato mai untampa tengko situru’, sia unnarra’ lampa kada la unneaKomi:

⁷ Iamotu mintu’ to ma’ suku Edom sia to Ismael, Moab sia to Hagar,

⁸ Sia Gebal sia Amon sia Amalek, tondok Filistin sola mintu’ pa’tondokan Tirus:

⁹ Ia duka tu Asyur sama turu’mo mintu’ tau iato mai, sia ussande’ mintu’ bati’na Lot. Sela

¹⁰ Parampoi tu tau iato mai susitu mangka Miparampoan to Midian, sia susitu lako Sisera, sia susi lako Yabin dio randan salu Kison.

¹¹ Tu disabu’imo dio En-Dor, sia susimo pangangku’.

¹² Iatu mintu’ to la’bi’na pasusii Oreb sia Zeeb, sia iatu mintu’ tedong pariu’na pasusii Zebah sia Salmuna.

¹³ Tu mangka ma’kada nakua: Maikomi taalai tapomana’! Tu inanNa Puang Matua.

¹⁴ O Kapenombangku, pasusii daun kayu nabaa angin tu tau iato mai, sia susi ongkan nairi’ angin.

¹⁵ Susi api unnimbakan pangala’ tamman, sia susito dukku api ullalle mintu’ tanete,

¹⁶ Susi dukamoto la Miula’ sumpu angin bara’Mi tu tau iato mai, sia patirambanni talimpuru’Mi.

¹⁷ Todingi siri’, anna daka’i tu sangamMi, o PUANG.

¹⁸ Da’ito anna kasirisan tu tau iato mai sia tiramban tontong sae lakona, sia da’ito anna maila’ sia anna sanggang.

¹⁹ Anna issanni kumua Kamu manna tu disanga PUANG, Patodoranna lan mintu’ narande tana kalua’.