PA’PUDIAN 80 - Sura' Madatu

Pangando malaku anna dipasule tama dandanna tu to Israel 80:1-20

¹ Lu lakona pangala sengo. Unturu’ baenan sengo bunga bakung. Kasa’bianna Asaf. Misa’ pa’pudian.

² O Pangkambi’na to Israel, patananni tu talingamMi! Tu umpatudu lalan bati’na Yusuf butung domba, o Kamumo tu unnisungi karubion, patiarrangi tu rupamMi.

³ Angkarammi dio tingayona Efraim sia Benyamin na Manasye tu kalalongamMi, amMi mai ullendokangkan.

⁴ Pasulekanni, o Puang Matua, tama dandanki, paparrangi tu lindoMi, angki dilendokan.

⁵ O PUANG, Kapenombanna mintu’ ma’dandan maritik, sangapapira tu kasengkeamMi ungkanoka passambayangna taumMi?

⁶ Uai mata mannamo Mibenni napotuo, ondongpi uai mata mannamo Mipamosoanni nairu’.

⁷ Mitananmokanni napenggaronto’i kasigaganna bali lembangki, sia nasitelleikan mintu’ ualingki.

⁸ O Kapenombanna mintu’ ma’dandan maritik, pasulekanni tama dandanki, paparrangi tu lindoMi, angki dilendokan.

⁹ Mibuakmo sia Mipalengka’ tu sangto’ anggoro’ dio mai tana Mesir, ammi ula’i lao tu mintu’ bangsa, Mitananni tu kayu iato.

¹⁰ Mipalapparammo inan, naurunganni mennuaka’ melo sia ussitutu’i padang.

¹¹ Mintu’ duka buntu naonganni ongan-onganna, sia mintu’ tangkena ungkapu’ kayu arasi’ sangbara’ padang.

¹² Napopendolok tu mai tangkena sae tama tasik, sia mintu’ lolona sae tama Salu.

¹³ Ma’apari amMi lo’po’ri tu tembo’na, naurunganni minda-minda lendu’ inde to lalan iato napeloloi bang.

¹⁴ Napepuraimo bai lampung, sia angganna olo’-olo’ dio lu padang pura ungkandei.

¹⁵ O Kapenombanna mintu’ ma’dandan maritik, suleKomi. Tiro lumbangi dao mai suruga, sia penunui, sia parinaai te mintu’ garonto’ anggoro’.

¹⁶ Tu pa’tado’ natanan lima kananMi, iamotu muane, Mipeloboran Kalemi.

¹⁷ Iatu kayu iato diballa butung rompon; sia mintu’ tau iato sabu’mo diona kaumpalessekamMi matamMi.

¹⁸ Rondongi limamMi tu to diona kananMi, iamotu to Mipeloboran Kalemi.

¹⁹ Iake susito, tae’mo angki la balik dio mai Kalemi, patuokanni angki meongli’ ussa’bu’ sangamMi.

²⁰ O PUANG Kapenombanna mintu’ ma’dandan maritik, pasulekanni, melo ke parrangi tu rupamMi, angki dilendokan.