PA’PUDIAN 75 - Sura' Madatu

Irusan nanii kare’dekan ara’Na PUANG 75:1-11

¹ Lu lakona pangala sengo. (Unturu’ baenan sengo:) Dandi’ bala’-bala’i. Misa’ sengo. Pa’pudianna Asaf.

² KipudiKomi, o Puang Matua, inang kipudiKomi, belanna mandappi’ sia tu sangamMi, sia mintu’na penggauran kalle-kalleamMi naulelean tau.

³ Iake Kulambi’mi tu allu’na, tae’ nasalai tang Kupaolai maloloi salunna:

⁴ Moi anna tigega’ tu lino sola issinna, apa Akumo tu umpabantangi tu mai parandanganna! Sela

⁵ MangkaMo’ ma’kada lako to matampo kumua: Da mimatampo. Sia lako to tang mekaaluk kumua: Da miumpatarangga tandukmi!

⁶ Sia da mipalayang tandukmi, sia da mitumonga-monga ma’kada.

⁷ Belanna tang lu dio mai matallo, tang lu dio mai matampu’, ba’tu lu lo’ mai padang aak nanii bu’tu kama’pakalayukan.

⁸ Sangadinna Puang Matuari tu ma’paolai salu, Iamo la umpasosso’ lu rokkoi tu misa’, anna pakendek lu langnganni tu misa’.

⁹ Belanna lan limanNa PUANG den tu irusan nanii uai anggoro’ re’de-re’de, tu ponno anggoro’ dibuli; sia Ia untua’i lan mai, apa mintu’ tu to tang mekaaluk lan lino ummimmi’i tu garoppa’na anna iru’i.

¹⁰ Apa iate aku la tontong bang kupa’peissanan tu iannato, sia umpakendekan pa’pudian Kapenombanna Yakub.

¹¹ Mintu’ tandukna to tang mekaaluk la Natepokki, apa mintu’ tandukna to malambu’ la dipatarangga.