PA’PUDIAN 69 - Sura' Madatu

Passambayangna to malambu’ tu narampoi parri’ sia bayo-bayo kamatean 69:1-37

¹ Lu lakona pangala sengo. Unturu’ baenan sengo bunga bakung. Pa’pudianna Daud.

² Lendokanna’, o Puang Matua, belanna natu’ba’mo’ uai.

³ Tammanna’ rokko buka mandalan, tu tae’ makarra’na dinii mellese; sia tallanna’ rokko liku mandalan, tu nanii ungkabu’na’ uai.

⁴ Mata’ka’mo’ meongli’-ongli’, sia materrekmo tu barokoku, sia maraunmo tu matangku ma’penunu untayan Kapenombangku.

⁵ Iatu to ungkabiri’ punala bangna’ mandu buda ia anna lamba’ beluakku; sia pasau’ tu to la ussabu’ina’, tu bulituk unnualina’; naparukuna’ ussondai barang apa tang kurampa.

⁶ O Puang Matua, Miissan tu kabagangku, sia iatu mintu’ salaku tae’ anna karerungan dio mai Kalemi.

⁷ Da napolean siri’ tu mintu’ to untayanKomi kutumang, o Puang PUANGna mintu’ ma’dandan maritik, sia da naattangan tu mintu’ to undaka’Komi kutumang, o Kapenombanna to Israel.

⁸ Belanna Kamumora angku tanggung kadibe’sean, sia natoding siri’ tu lindoku.

⁹ Belanna butungmo’ to toyang tondok lako mintu’ siulu’ku, sia to tang siperambumo’ mintu’ to nadadian indo’ku.

¹⁰ Belanna kamakaritutuan diona banuamMi umpapuru’mo penaangku, sia mintu’ pabe’sena to umbe’seKomi, narampoimo’.

¹¹ Iatongku parra uai matangku, angku popengkadiongan kaleku ma’puasa, ia duka nabe’seanna’ to.

¹² Sia iatongku potamangkale karoro’ napoparumbasanna’ tau iato mai.

¹³ Mintu’ to ma’ misa-misa dio to’ babangan tondok ungkada-kadaina’, sia Naposengona’ to pangirusan.

¹⁴ Apa iatu aku te massambayangna’ mati’ Kalemi, o PUANG, ke attu kamasorokamMi, o Puang Matua, baliina’ pa’tunduan maruru’Mi, sitinaya kamasokanan kapuaMi.

¹⁵ Riu’na’ diong mai buka da angku tamman, rampananna’ dikka’ dio mai mintu’ to ungkabiri’na’, sia endekanna’ lan mai mintu’ uai mandalan;

¹⁶ da dikka’ nakabu’na’ uai saba’, sia da naorrosanna’ uai mandalan sia da nakemunna’ liku mandalan.

¹⁷ Tanding talingana’ dikka’, o PUANG, belanna marampa’ tu kamasokanamMi. Sailena’ sitinaya kamamasean kapuaMi.

¹⁸ Da Mitanannina’ boko’ te aku, taumMi, belanna pussakna’! Tanding talingana’ madomi’.

¹⁹ Reke’i tu sumanga’ku, sia lendokanni, rampananna’ dikka’ belanna mintu’ ualingku.

²⁰ Miissan tu kadibe’seangku sia siri’ku sia attangangku, sia mintu’ to umpandasana’ bendan dio oloMi.

²¹ Iatu kadibe’sean urranna’mo penaangku, napourunganni langga’ tu kaleku, untayanna’ masena tau, apa tae’ra, sia untayanna’ to ma’pakatana, apa tae’ra.

²² Ondongpi pa’du nabenna’ tau iato mai kukande, sia napairu’na’ sukka tongku ma’rang.

²³ Da’ito namendadimora poya tu medana dio tingayona, sia iatu to nasolan kumande mendadi misa’ ba’tikan.

²⁴ Melo ke dipamaraunni tu matanna tau iato mai, natang pakita, sia diparumonting bang tu aakna:

²⁵ Patu’ba’i kasengkeamMi tu tau iato mai, sia melo ke naruai kamare’dekanna ara’Mi.

²⁶ Nake makarorrongi tu lili’na pangosokan tendana, nake tang nanii tau lan tu tendana.

²⁷ Belanna naula’ sumpumo tu to mangka Mipata’pai parri’ sia naulelean tu kamapa’diranna tu mai to mangka Mibangkei.

²⁸ Tompoi sala tu salana tau iato mai, naurunganni tang nalambi’ kadibilangan malolo dio mai Kalemi.

²⁹ Nake dibutai lan sura’katuoan, sia iatu sanganna da nadisura’ dipasola sanganna to malambu’.

³⁰ Apa iatu aku te mandasana’ sia mapa’di’na’, melo ke naongannina’ kamakarimmanan lu dio mai Kalemi, o Puang Matua.

³¹ La kupudi nanian tu sanganNa Puang Matua, sia la kupakala’bi’ nanian kurre sumanga’.

³² Mandu naala ia penaanNa PUANG tu iannato anna iatu sapi laki, ba’tu anak sapi tu ketanduknamo sia kekanukunnamo.

³³ Iatu mintu’ to umpopengkadiongan penaanna la natiro tu iannato situang kaparannuan; melo ke pa’yakki tu penaammi, e kamu mintu’ to undaka’ Puang Matua.

³⁴ Belanna Natanding talinga PUANG tu to tae’, sia mintu’ taunNa tu dipattang tae’ Natapa’.

³⁵ La napudi langi’ sola lino tu Puang, sia mintu’ tasik sola mintu’ tu angge menono’ lan.

³⁶ Belanna la Nalendokan Puang Matua tu Sion, sia la Nabangun sule tu mintu’ tondok Yehuda, anna nii to ma’tondok torro sia la namana’.

³⁷ Mintu’ tarukna taunNa la umpomana’i, sia mintu’ to ungkamali’i tu sanganNa la torro lan.