PA’PUDIAN 68 - Sura' Madatu

Misa’ nanian umpudi kapataloanNa Puang Matua 68:1-36

¹ Lu lakona pangala sengo. Misa’ nanian pa’pudianna Daud.

² Ke’de’ tu Puang Matua, namintu’ ualinna sisarak-sarak, angganna to ungkabiri’i mallai dio mai oloNa.

³ Susi rambu pa’de poto’, susi dukamoto tu tau iato mai Mipapa’de poto’; sia butung panti’ lollo’ nakande api, susi dukamoto tu to tang mekaaluk la rabun dio oloNa Puang Matua.

⁴ Apa iatu mintu’ to malambu’ la parannu-rannu sia sila’tekan dio oloNa Puang Matua, sia parannu batu ba’tengku sia sende paiman.

⁵ Penanianni tu Kapenomban, pakendekanni pa’pudian tu sanganNa, ranteanni batattaNa tu To ma’kareta dio lu padang alla’; iatu sanganNa digente’ PUANG, ammi lo’dok to kaiyangan dio oloNa.

⁶ Iatu Puang Matua tongkon lan inan maindanNa, Iamo umpoanak pia biung sia to ma’pakalolona mintu’ baine balu.

⁷ Iatu to disitampei Napatongkon Puang Matua sola rapunna, sia iatu to dipattang la Napasun situang kamauparan, apa iatu to battuk la untongkonni padang rangke.

⁸ O Puang Matua, iatomMi sun lumingka dolo dio tingayona taumMi sia iatomMi olai padang pangallaran. Sela

⁹ Tisenomi tu lino, sia lollo’ tu langi’, dio oloNa Puang Matua, ia duka tu Sinai tiseno dio oloNa Puang Matua, Kapenombanna to Israel.

¹⁰ O Puang Matua, Kamumo umpasae uran kamban, sia Kamumo umpapaya taumMi tonna kopa.

¹¹ Iatu tuntunanMi ma’baanan lan, o Puang Matua, diona kamasokanamMi amMi pasakkaran nasangmi to mandasa.

¹² Ma’pau tang sala-sala tu Puang; na mintu’ baine umpa’peissanan kareba melo, sae ma’baanan.

¹³ Iatu mai datu, pangulu pa’barani mallai, mallai sola nasang, sia iatu baine la’bi’ lan banua untaa-taa pangrampa.

¹⁴ La mamma’-mamma’rokomika lan lu lantang domba? Iatu pani’ bu’ku’ nasapu’ salaka, na iatu bulunna nasapu’ bulaan riri,

¹⁵ iatonna pasisarak-sarakki Puang umpoissan angge maritik tu mai datu inde to, ma’ambun makkomi tu buntu Zalmon.

¹⁶ Iatu buntu Basan buntu malangka’ tongan, sia iatu buntu Basan iamo buntu ma’botto-botto:

¹⁷ E mintu’ buntu ma’botto-botto, ma’apari ammi sambiri matai, tu buntu Naturo ta’ba Puang Matua Nanii torro? Ondongpi la mari’pi sae lakona inde to tu Puang Matua.

¹⁸ Duangpulo sa’bu tu karetaNa Puang Matua, ma’sa’bu’-sa’bu’ ria; Iatu Puang tilelemo dao mai buntu Sinai lu tama inan maindan.

¹⁹ MangkamoKomi kendek langngan inan madaoan sia Mikaloli’mo tu to dirampa; mangkamoKomi untarima pamengan dipennoloan dio mai tolino, pissanmi to iatu to battuk la torro duka dao, o PUANG Kapenomban.

²⁰ Mintu’na kadipudian lu langngan Puang; tu urrande pala’ki’ kiallo-kiallo. Iamo Kapenomban, oto’na kasalamaranta. Sela

²¹ Iatu Kapenomban, tu kitanna Iamo Puang, tu Kapenomban mekamasei kamakarimmanan, sia iatu PUANG, Puangta urrampanangki’ dio mai kamatean.

²² Ondongpi, la Nabissa’ Puang Matua tu passaronganna mintu’ ualinna, sia kararo ulu kebeluakna to tonang lan kakadakeanna.

²³ Mangkamo Napokada Puang: La Kupasule dio mai Basan, la Kupasule diong mai tasik mandalan.

²⁴ Kumua ammu otonni tama rara tu lentekmu, sia anna manglepa’ tu asummu dio mai mintu’ ualimmu!

²⁵ Natiromo sola nasang tu kadibumbunanna boko’Mi, o Puang Matua, iamotu kadibumbunanna boko’Na Puangku sia Datungku mentama inan maindan.

²⁶ Mintu’ to sumengo dolo dio tingayo, sia iatu to massu’dekan undi dio boko’, nalan tangnga tu anak dara ma’ganda’-ganda’.

²⁷ Pudimi tu Puang Matua lan mintu’ kaponan menani, Iamotu PUANG, tu uainna Israel!

²⁸ Benyamin dio, iamotu bongsunna, tu ma’pana’ta’, mintu’ pangulunna Yehuda ma’balole’, mintu’ pangulunna Zebulon, sia mintu’ pangulunna Naftali.

²⁹ Nasuamoko kuasa Kapenombammu, ammu pokuasai; o Puang Matua pa’pekitanammi tu kuasamMi, Kamumo, tu mangka umposara’kan.

³⁰ Belanna diona banuamMi dio Yerusalem, anna pennoloan pamengan lako Kalemi tu mai ba’tu pira-pira datu.

³¹ Pagarrikki tu mai olo’-olo’ lan lu to’ marrang, sia pasangna mintu’ sapi laki sola anak sapinna tu mai bangsa. Kamu, tu ussolangi tu mintu’ to umbudanan salaka, pasisarak-sarakki tu mai bangsa naporai untanan ra’.

³² Ba’tu pira-pira tu to la’bi’ la sae dio mai tana Mesir, sia iatu tana Etiopia la ta’pa umpatado pala’ mabusanna lako Puang Matua.

³³ E mintu’ parenta lan te lino, penanianni tu Puang Matua, pakendekanni pa’pudian tu Puang; Sela

³⁴ Iamotu To ma’kareta dao masuanggana mintu’ langi’ tempon dio mai, rangimi, umpalaomo gamaranNa, iamotu gamara kalle-kallean!

³⁵ Pangke’i tu kamatotoranNa Puang Matua; iatu kataromposanNa dio Israel sia iatu kuasanNa dao masuangganna.

³⁶ O Puang Matua, metakurangKomi lan mai inan maindanMi. Iatu Kapenombanna Israel, Iamora umpa’kamasean kamatotoran sia kamawatangan lako taunNa. Na lulakomora Puang Matua tu mintu’na kadipudian.