PA’PUDIAN 62 - Sura' Madatu

Kamarampasanna to umposande’ Puang Matua 62:1-13

¹ Lu lakona pangala sengo. Unturu’ baenan sengo Yedutun. Pa’pudianna Daud.

² Rapa’ penaangku ma’patu’tun lako Puang Matua, tu kuNii ungkabu’tui kasalamaran:

³ Ia manna buntu batungku sia oto’na kasalamarangku, Iamo tambakukungku, natae’ angku la masang bang tilende’.

⁴ Sangapaparokomi la umbala’-bala’ tau? Ammi dipasiapanan nasang sangtinti rinding la songka, sia tembo’ la rondon.

⁵ Ia manna nabisara tu la umpasisayuranni kamala’biranna, naporai tau iato mai tu mo’rang; iatu pudukna ma’passakke, apa iatu penaanna ma’tampakki ropu. Sela

⁶ Rapa’ penaangku ma’patu’tun lako Puang Matua, belanna diori mai tu rannungku.

⁷ Ia manna buntu batungku sia oto’na kasalamarangku, Iamo tambakukungku, natae’ angku la tilende’ len.

⁸ Lan Puang Matua nanii tu kasalamarangku sia kamala’birangku, iatu buntu batu matoto’ku sia pentirerungangku iamo Puang Matua.

⁹ E solaku, tontongkomi urrannuanNi, sia bungka’i tu penaammi dio oloNa; iatu Puang Matua Iamo pentirerunganta. Sela

¹⁰ Iatu mai to bitti’ tae’ bua’na sia iatu mai to la’bi’ inang mo’rang; la tongka’ tu tau iato mai dio timbangan, sia mandu maringngan sola nasangi na iatu mai apa tang kebattuan.

¹¹ Da mirannuanni tu apa mipabu’tu ma’pakario-rio, sia da miparannuan lo’bangi tu apa mipabu’tu mangrampa; iake memba’ka’i tu iananmi, da mipala’ka’ lakoi tu penaammi.

¹² Pissanmo ma’kada tu Puang Matua, penduammo kurangi Nakua: Iatu kuasa, Puang Matua Ia tu ampunna.

¹³ Sia iatu kamasokanan, Kamu duka puangna, o Puang, belanna Mipabala’i tu tau sitinaya penggauran simisa’-misa’na.