PA’PUDIAN 6 - Sura' Madatu

Passambayang ke nareke’ki’ kasanggangan la ungka’tu sunga’ 6:1-11

¹ Lu lakona pangala sengo; dipasiala oni katapi. Diala madiong. Pa’pudianna Daud.

² O PUANG, da Miukungna’ kasengkeamMi, sia da Mipa’di’ina’ kamare’dekamMi!

³ Katuru-turuina’, o PUANG, belanna longsena’; pamatanana’, o PUANG, belanna mintu’ bukungku paruninin!

⁴ Lendu’ tirambanna tu penaangku, iatu Kamunna, o PUANG, sangapapaKomi?

⁵ SuleKomi, o PUANG, rampananni tu deatangku, karimmannina’ tete dio kamasokanamMi!

⁶ Belanna lan kamatean tae’mo kapengkilalan lako Kalemi, sia lan lino to mate mindapa la umpudiKomi?

⁷ Mata’ka’ tonganmo’ sumarro; bongi-bongi umpennampa’na’ uai matangku; umpotilan tangi’ tang marangaku.

⁸ Malanmo tu matangku napobua’ karosso-inaan, sia tang tibida’ natumang mintu’ ualingku.

⁹ Mallaikomi dio mai kaleku, e mintu’ to umpogau’ kakadakean, belanna Naperangiimo PUANG tu tangi’ku.

¹⁰ Naperangiimo PUANG tu pa’palakungku, sia la Natarima tu pasambayangku.

¹¹ Mintu’na ualingku la masiri’, sia lendu’ tirambanna; tau iato mai ta’pa la sule leko’ situang kamasirisan.