PA’PUDIAN 57 - Sura' Madatu

Rapa’ tu penaanta, lan kamaparrisan, ke taposande’i tu Puang Matua 57:1-12

¹ Lu lakona pangala sengo. Unturu’ baenan sengo: Dandi’ bala’-bala’i. Pa’pudianna Daud; misa’ ianan ballo, tonna mallai dio mai olona Saul, anna male tama lo’ko’.

² Katuru-turuina’, o Puang Matua, katuru-turuina’, belanna mati’ Kalemi nanii mentilindung deatangku; ondongpi diong to’ ongan pani’Mi kunii mentilindung sae lako lendu’ malolona te kasanggangan.

³ Meongli’na’ lako Puang Matua, Puang Patodoranna, lako Puang Matua, tu umpasundunanna’ mintu’ apa.

⁴ Ia la umpasonglo’ pa’tunduan dao mai suruga sia ullendokanna’, sia umpakasiri’ to ullullu’na’. Sela Puang Matua la umpasonglo’ kamasokananNa sia kamanapparanNa.

⁵ Sumpandanna’ tang panggega’ naparitangnga ba’tu pira-pira singa, iamotu to umpadukku api kasanggangan, tu mati’ ma’rupa tau; susi doke sia tinaran tu isinna, sia lilana susi la’bo’ mataran.

⁶ Pamatandei tu Kalemi daona lu langi’, o Puang Matua, sangapoi anna ussamboi lino tu kamala’biramMi.

⁷ Napatananni bunde tau iato mai tu pentengkaku, nanii umparanggang penaangku, nabo’bok dio to’ lalanku tu patuang, apa ia kalena tobang rokko. Sela

⁸ Rapa’ tu penaangku, o Puang Matua, inang rapa’ tu penaangku; la menanina’ sia umpakendek pa’pudian.

⁹ Millikko, e penaangku, millikkomi, e dandi sia katapi; la untundanna’ dannari lambe’.

¹⁰ O PUANG, la kupudiKomi dio lu mintu’ bangsa, sia la umpakendekna’ pa’pudian mati’ dio lu mintu’ to sangpetayanan:

¹¹ Belanna iatu kamasokanamMi sumpu langngan langi’, sia iatu kamarurusamMi tu’tun dao massaliu’na.

¹² Pamatandei tu Kalemi daona lu langi’, o Puang Matua, sangapaoi anna ussamboi lino tu kamala’biramMi.