PA’PUDIAN 56 - Sura' Madatu

Umposande’ Puang Matua lan kamaparrisan 56:1-14

¹ Lu lakona pangala sengo. Unturu’ baenan sengo: Bu’ku’ dao kayu tarpin mambela. Pa’pudianna Daud, misa’ ianan ballo, tonna tingkanni to Filistin tu Daud dio tondok Gat.

² Katuru-turuina’, o Puang Matua, belanna la nalullu’na’ tolino, napasumpuna’ tu mai uali kiallo-kiallo.

³ Mintu’ ualingku ullullu’na’ kiallo-kiallo, belanna buda tu tau urrariina’ situang kamatampoanna.

⁴ Iake narampoina’ kamatakuran, Kamu kuposande’.

⁵ Lako Puang Matua – la kupudi tu kadanNa –, inang lako Puang Matua tu kunii sande’, natae’ kumataku’; apara tu ma’din nagauranna’ batang kalena tau?

⁶ Tontong keallo tu tau iato mai umbulang leko’ kadangku sia mintu’ tangnga’na la ussanggangina’.

⁷ Sipakulu-kulu tu tau iato mai sia membuni, sia umpenunu tengkaku, anna tumaya la unnala sunga’ku.

⁸ Ma’apai nala ma’din tilendok tu tau iato mai nabudamo kakadakeanna? Pessambakanni tu tau iato mai diona kasengkeamMi, o Puang Matua!

⁹ Misimporrosammo tu salamba salaoku, sia patamai buli-bulimMi tu uai matangku; Tang tisura’ nasangmoraka to lan sura’Mi?

¹⁰ Ia angku meongli’, maneri mallai sule tu mintu’ ualingku, kutandai tu iannate kumua: narondongna’ Puang Matua.

¹¹ Lako Puang Matua – la kupudi tu kadanNa –, lako Puang – la kupudi tu kadanNa –

¹² Inang lako Puang Matua tu kunii sande’, natae’ kumataku’; apara tu ma’din nagauranna’ tolino?

¹³ Mati’ Kalemi, o Puang Matua, pato’ kunii umpalesso’ mintu’ pangallonangku mati’ Kalemi la kunii umpennoloan pemala’ pangallonan.

¹⁴ Belanna Mirampanammo tu deatangku dio mai kamatean, sia Mikampaina’ natae’ natilende’ tu lentekku, kumua angku lolang dio oloNa Puang Matua lan arrangna to tuo.