PA’PUDIAN 55 - Sura' Madatu

Passambayangna Daud umpalakui dirampanan dio mai misa’ sangmuane tang maruru’na 55:1-24

¹ Lu lakona pangala sengo; dipasiala oni katapi. Misa’ gelong bangunan ada’na Daud.

² O Puang Matua, tananni talinga tu passambayangku, sia da Mitananni boko’ tu pa’palakungku.

³ Kilalaina’ dikka’ sia pebaliina’; apa tae’ upu’ku salamba salao situang kamagiangan sia sarro budangku.

⁴ Napobua’ angnga’na ualingku, sia pa’pakario-riona to tang mekaaluk, belanna nabala’-bala’na’, sia napandasana’ situang kamare’dekanna.

⁵ Ma’bara-bara tu penaangku lan, sia kamasanganna kamatean urrampoina’.

⁶ Kamatakuran sia karumanggangan urrampoina’, sia kamasangan ungkapu’na’.

⁷ Kuurunganni ma’kada: Lendu’ ia maelona, kengku kepani’ susi bu’ku’, angku mentia’ male lako tu ma’dinna kunii torro;

⁸ sia la mambela kunii mentia’, angku ma’bongi dio lu padang aak. Sela

⁹ Sia tikara-karana’ mentirerung angku tilendok dio mai talimpuru’ sia angin bara’.

¹⁰ Pamalingi tu tau iato mai, o Puang, sia patangma’rundunanni tu basana, belanna pa’pakario-rio sia kasigagan nata’pai matangku lan kota.

¹¹ Allo bongi lumiling ma’kampa dao lu bentengna, kakadakean sia kasanggangan untonangi;

¹² Ondongpi tu penggauran umpabu’tu kasanggangan lalo lan, sia iatu pa’pakario-rio sia kalando-pa’duan tae’ anna tampe tananan pasa’na.

¹³ Belanna tangia uali tu umbelle’na’, iake la iai to, manassa kutemmeran ara’ rumeke-mekeku; sia tangiara to ungkabiri’na’ tu matampo unneana’, iake la iai to, manassa kuissan umpembunianni.

¹⁴ Sangadinna iko, misa’ to kupadan, iamo sangmuane kukatappa’i,

¹⁵ Lendu’ ia mammingna bang tu kasisangmuaneanta, sumalong-malong lan banuanNa Puang Matua sola to buda.

¹⁶ Nake ta’pa narampoi kamatean tu tau iato mai, nake tama tuoi lino to mate, belanna lan banuanna tu kakadakean sia lan ba’tengna.

¹⁷ Apa iatu aku te meongli’na’ lako Puang Matua, na PUANG la ullendokanna’.

¹⁸ Melambi’ sia makaroen sia iake tangngai allo la umparampona’ kamasussan sia sarroku, la Natanding talinga duka tu peongli’ku.

¹⁹ Ia ullendokan marampa’na’ dio mai kapararian untingoina’, belanna buda tongan tau unneana’.

²⁰ La Natanding talinga Puang Matua sia la Napasosso’ lu rokko tu tau iato mai – belanna tempon dio mai untorroi isungan kapayunganNa – Sela Apa noka tu tau iato mai mengkatoba’, sia tae’ naungkataku’ Puang Matua.

²¹ Mangka duka napata’pai lima tu to nasisangmuanean, sia umpinda lampa kadanna.

²² Iatu pudukna mandu malannang anna bumbungan pa’pamakko, apa iatu penaanna lan passigagan, sia iatu buangan kadanna mandu malamma’ anna boka’, apa mintu’nato butung to la’bo’ tibua’.

²³ Sorongi lako PUANG tu kaselangammu, Ia la undaranaiko; inang tang Naeloran tu to malambu’ la tilende’.

²⁴ Kamumo, o Puang Matua, la umpembuanganni rokko liku kasanggangan tu tau iato mai; iatu to umpato’do rara sia lando pa’du la sanggang lan kamatangnga-tauanna. Apa iatu aku te la sande’na’ lako Kalemi.