PA’PUDIAN 47 - Sura' Madatu

Kapa’pudi-pudian lako Puang Matua, tu undatui mintu’ narande tana 47:1-10

¹ Lu lakona pangala sengo. Pa’pudianna to Korah.

² E mintu’ bangsa, massala’pa-la’pakomi, sia unnarrak langngan Puang Matua situang la’tek kaparannuan.

³ Belanna iatu PUANG Patodoranna metakuran, Iamo Datu kapua lan mintu’ narande tana.

⁴ Ia umpopengkanorongi tu mintu’ bangsa lako kaleki, sia Napatundukangkan tu mintu’ to sangpetayanan!

⁵ Ia untonnorangkan mana’, iamotu tana napomala’bi’ Yakub, to Napakaboro’. Sela

⁶ Kendekmo tu Puang Matua langngan naturu’ arrak, Iamotu PUANG, naturu’ oni tarompe’ pua.

⁷ PakendekanNi pa’pudian tu Puang Matua, pakendekanNi pa’pudian, pakendekanNi pa’pudian tu Datunta.

⁸ Belanna Puang Matua undatui sangullele lino, pakendekanNi nanian kebattuan.

⁹ Puang Matua umparentai tu mintu’ bangsa, sia Puang Matua unnisungi isungan kapayungan maindanNa.

¹⁰ Mintu’ to kapua dio mai mintu’ bangsa sipulungmo, la mendadi taunNa Kapenombanna Abraham. Belanna Puang Matua umpoissanni tu rinding batunna lino; Iamo ditiro mala’bi’.