PA’PUDIAN 46 - Sura' Madatu

Puang Matua misa’ tambakuku matoto’ 46:1-12

¹ Lu lakona pangala sengo. Misa’ pa’pudianna to Korah. Unturu’ baenan sengo: Anak dara. Misa’ sengo.

² Iatu Puang Matua iamo pentilindungangki, sia oto’na kamatotorangki, misa’ pa’tunduan tongan lan kapussakan.

³ Iamoto anna tae’ angki la mataku’ moi anna tilele te lino, sia moi anna la tiberu tu mintu’ buntu rokko atena tasik.

⁴ Moi anna mongngo’ sia tikula’dak tu uainna, sia moi anna mintu’ buntu tiseno napobua’ tikula’dakna. Sela Apa Puangna mintu’ ma’dandan maritik urrondongkanni, sia iatu Kapenombanna Yakub iamo kipotambakuku matoto’. Sela

⁵ Den misa’ salu: iatu salossokna umpopaiman kotaNa Puang Matua, inan mandu maindan naisungi Patodoranna.

⁶ Tongkon lan tangngana tu Puang Matua, tae’ nala tigega’ len tu tondok iato, iake tibangka’mi masiang la Natundui Puang Matua.

⁷ Marukka’mi tu mintu’ bangsa sia tigega’ tu mintu’ parenta, sumarabami tu Puang, anna bonno’ tu lino.

⁸ PUANGna mintu ma’dandan maritik urrondongkanni, sia iatu Kapenombanna Yakub iamo kipotambakuku matoto’. Sela

⁹ Maimokomi untiroi tu penggauranNa PUANG, tu umpabu’tu kasanggangan lan lino,

¹⁰ Napasoro’ ambun tu tananan ra’ landa’ lako randanna langi’, Narebong-rebong tu tinaran, sia Napolo tu doke, sia Natunu api tu mintu’ kareta.

¹¹ Rapa’komi sia issanni kumua Akumo tu Puang Matua; Akumo tu mala’bi’ dio lu mintu’ bangsa, sia mala’bi’ lan lino.

¹² PUANGna mintu’ ma’dandan maritik urrondongkanni; sia iatu Kapenombanna Yakub iamo kipotambakuku matoto’. Sela