PA’PUDIAN 45 - Sura' Madatu

Sengo pa’passakke diona rampanan kapa’na datu 45:1-18

¹ Lu lakona pangala sengo. Unturu’ baenan sengo bunga bakung. Misa’ gelong bangunan ada’na to Korah. Londe pa’kaboro’.

² Tiakka’ tu penaangku la umpokada kada masokan, la ussengoanna’ datu, iatu lilaku susi peoki’na to malute mangoki’.

³ Mandu maballokomi kamu anna mintu’ ma’rupa tau, iatu kamabalelean dipasitutu’mo randan pudukmi, iamoto anna pamasakkekomi Puang Matua tontong sae lakona.

⁴ Takinni tu la’bo’mi dio aakmi, e lalong, situang kabarre-alloammi sia kamala’birammi.

⁵ Sangapaoi mimaupa’ dao sakeammi, lao umposara’ kamanapparan, kaumpamadiongan penaa sia katonganan, na lima kananmi la umpatudukomi tu mai masangna.

⁶ Iatu mai tinaranmi mata’tak! – ba’tu pira-pira bangsa mipatunduk – iatu tinaranmi lendu’ tama banua mintu’ ualinna datu.

⁷ Isungan kapayungamMi, o Puang Matua, tontong sae lakona, Sia tekken kamalamburan iamo tekken kapayungammi.

⁸ Mikamali’ tu kamaloloan ammi sayu kakelokan; iamoto, o Puang Matua, anna bolloikomi minna’ Kapenombammi, tanda kasendean, Napalosongkomi na iatu mai solami.

⁹ Mintu’ tamangkalemi situtu’ bau muru sia andelen sia kadinge’; sia lan mai tongkonan layuk dikararak gading naniimo tu mintu’ paningoan diritii umpasendekomi.

¹⁰ Ba’tu pira-pira tu lai’na datu tu tama mipobaanan sola anak dara baanammi; sia dio kananmi bendan tu datu baine ma’pakean bulaan tasak dio mai Ofir.

¹¹ Perangii, e Lai’, kilalai sia patananni talingammi. Paboko’imi penaa tu bangsami sia to lan banuanna mendadiammi.

¹² Ke naalai penaanna datu tu kamaballoammi, belanna iamo dipopuang, la tukkukomi lako.

¹³ Iatu Lai’na datu Tirus la sae umpennoloan pamenganna, sia iatu mai to la’bi’na mintu’ bangsa malaku la mikasokanni.

¹⁴ Iatu Lai’na datu iato mala’bi’ tongan lan bilik tongkonan layuk, sia iatu tamangkalena disulan riti bulaan.

¹⁵ La dipopennolo lako datu situang tamangkalena makkarupa-rupa sulanna, sia mintu’ anak dara sangbara’na, umbaananni la dipopennolo duka lako kalemi.

¹⁶ Iatu tau iato mai la disolan naturu’ kaparannuan sia arrak, anna tama tongkonan layukna datu.

¹⁷ Mintu’ tu mai anakmi la ussonda to dolomi, tu la miala ampu lembang lan mintu’ tondok.

¹⁸ La kupokada tu sangammi anna disiosso’i dianna batu silambi’; iamoto anna mintu’ bangsa la umpudikomi tontong sae lakona.