PA’PUDIAN 41 - Sura' Madatu

Passambayang lan kamasakian 41:1-14

¹ Lu lakona pangala sengo. Pa’pudianna Daud.

² Maupa’ tu to ungkilalai to bongko; manassa la Narampanan PUANG, ke allo kamaparrisan.

³ La Nakaritutui PUANG sia Napamalambe’ sunga’; anNa dipudi lan te lino; sia tae’ len Mila ussorongi lako pa’poraianna ualinna.

⁴ PUANG ussande’i dao inan kamasakianna, Kamumo umpopembali a’ganna dao inan mamma’na ke masakii.

⁵ Kukuami: O PUANG, kamaseina’ dikka’, sia pamatanana’ belanna kasalammo’ lako Kalemi.

⁶ Mintu’na ualingku umpokada kadakei tu diona aku, nakua: Piranra nala mate sia pa’de tu sanganna?

⁷ Iake saei misa’ unto’longina’, ma’kada leko’, sia urrampun kakadakean lan penaanna, anna tassu’ umpatale’i tu iannato.

⁸ Mintu’ to ungkabiri’na’, sibisik-bisik umpokadana’, sia sanda kakadakean, natannunanna’ nakua:

⁹ Le’ke’ misa’ saki tang dampi-dampian lako kalena, iamoto totemo mamma’mo anna tae’mo nala malimbangun sule.

¹⁰ Ondongpi, iatu sangmuane karra’ku tu kupatongan, sia kusolan kumande unnande’ lentekna urrea’na’.

¹¹ Apa Kamu, o Puang, kamaseina’ dikka’ sia pamillikna’, angku pabala’i tu tau iato mai.

¹² Naindeto kunii unnissanni kumua Miporaina’, ke tae’i napoparannu paimanni ualingku tu kasanggangangku.

¹³ Iate aku te Misande’na’ tete dio kamasalloranna penaangku, sia Kamumo umpatulangdanna’ dio oloMi tontong sae lakona.

¹⁴ Mintu’na kadipudian lu lako PUANG, Kapenombanna to Israel. Tempon dio mai tontong sae lakona. Amin, amin.