PA’PUDIAN 4 - Sura' Madatu

Pangando ke bongi 4:1-9

¹ Lu lakona pangala sengo; dipasiala oni katapi. Pa’pudianna Daud.

² Pebaliina’, ke meongli’na’. O Puang Matua, oto’na kamaloloangku! Tu umpamaluanganna’, ke si’pi’na’. Katuru-turuina’ sia tanding talingai tu passambayangku!

³ E pia muane, sangapapa la ditunai tu kamala’birangku, sangapapokomi la umbudanan apa tang kebattuan, umparri-parri kamorangan?

⁴ Apa la miissan kumua iatu PUANG mangkamo umpamarimbanganni Kalena tu misa’ to Naporai; la Natanannina’ talinga PUANG, ke meongli’na’ lako Kalena.

⁵ Mataku’ magiangkomi, apa da mipogau’ kasalan, tangnga’ kalenai lan penaammi diong dali’ patindoammi, ammi pari’pi. Sela

⁶ Pennoloanni tu pesuru’ situru’ tu pato’na, sia patonganNi tu PUANG!

⁷ Buda tau ma’kada nakua: Mindara tu la umpakitangki’ kameloan? Paarrangikan arrang lindoMi, o PUANG!

⁸ MangkamoKomi umpatamai kaparannuan batu ba’tangku, ondong ia na kaparannuanna tau iato mai tonna memba’ka’ tu gandungna sia uai anggoro’na.

⁹ La bambangna’ sia la mamma’ marampa’na’, belanna Kamu manna, o PUANG, umpatorro manamanna’.