PA’PUDIAN 39 - Sura' Madatu

Passambayang umpalaku karapasan penaa untiro a’gan tang marendeng 39:1-14

¹ Lu lakona pangala sengo; lako Yedutun. Pa’pudianna Daud.

² Nakua kadangku: La makaritutuna’ lan mintu’ lalanku, da angku pogau’ kasalan natumang lilaku; la kusanga’ tu pudukku, ke sitingayopa’ to tang mekaaluk.

³ Kupakari’pi bangmo tu kaleku tang ma’kada sia kupakappa, ma’loko-loko bangna’ sisayuran melona, apa sakerangngan-rangnganna karossoangku.

⁴ Re’dekmi tu penaangku lan, marassanmo’ ma’tangnga’-tangnga’ dukkumi tu api; manera’ umbungka’ sadangku, ma’kada:

⁵ O PUANG, paissananna’ tu lampakku, sia sangapara lambe’na tu sunga’ku, angku issanni tumba katangmarendenganna a’gangku.

⁶ Manassa iatu sunga’ku sangdangkanri mangka Milampak, sia iatu katuoangku butung bayo-bayo bangri dio oloMi; ondongpi mintu’ tau bendan, susi bangri damo’. Sela

⁷ Iatu mintu’ tau timbayo bangri susi bayo-bayo; ussara’i punala bang kalena, untombon ianan, apa tae’ naissanni minda la umpomaruai.

⁸ Na totemo, apapara tu la kutayan, o Puang? Mati’ri Kalemi nanii kapa’rannuanangku.

⁹ Rampananna’ dio mai mintu’ salaku, sia da Mipatulangdanna’ napotombonan dollok to baga.

¹⁰ Ma’loko-lokomo’, tae’mo kubungka’ len pudukku, belanna Kamumo umpogau’i.

¹¹ Patoyangna’ dio mai parri’ bu’tu lu mai Kalemi, masangna’ belanna natemme’ limamMi.

¹² Iake Mipandasai tu tau, belanna natumang kakelokanna, misanggang tu kameloanna susito nakande busung, manassa iatu mintu’ tolino susi bangri damo’. Sela

¹³ Perangiimi tu passambayangku, o PUANG, sia tananni talingamMi tu pengkamoyaku, sia da Mipa’loko-lokoi tu tangi’ tang marangangku, belanna iate aku te misa’na’ to sae dio Kalemi, sia to mentiruran susi mintu’ to doloku.

¹⁴ Saile randenna’, angku parannu paimanpa, kumane messala indete sia pa’de.