PA’PUDIAN 31 - Sura' Madatu

Pa’pakatana lan kamaparrisan 31:1-25

¹ Lu lakona pangala sengo, Pa’pudianna Daud.

² O PUANG, mati’ kunii mentirerung; da maro’ angku kasirisan! Rampananna’ tete dio kamaloloamMi.

³ Tanannina’ talinga, sia rampananna’ madomi’, sangapaoi angku pobuntu batu pentirerungangKomi,

⁴ Belanna Kamumo buntu batungku sia tambakukungku, iamoto rendenna’ sia solanna’ tete dio sangamMi.

⁵ La Midu’dukna’ lan mai porro’ natananan-bunianna’ tau, belanna Kamumo sanderan matoto’ku.

⁶ Tamamo lisu pala’Mi kunii ussorong penaangku, mangkamo’ Milendokan, o PUANG, Puang Matua maruru’!

⁷ Kukagi’gi’, tu to umpenombai apa tang kebattuan sia tae’ patunna, sia sande’pa’ lako PUANG.

⁸ La umpomela’tekna’ sia umpoparannu kamasokanamMi, belanna Mitiromo tu kamandasangku, sia Miissanmo tu kamaparrisanna deatangku.

⁹ Sia tae’ Misorongna’ tama lisu pala’na uali, sangadinna Mipopellesemo tu lentekku dio malona’na.

¹⁰ Kamaseina’, o PUANG, belanna lanna’ kamagiangan, belanna rosso inaa anna malanmo tu matangku, sia langga’ tu sumanga’ku, sia kaleku.

¹¹ Belanna samandappi’-dappi’na sunga’ku napobua’ karossoan, sia rondon bala batu tu taun katuoangku napobua’ kasumarroan, moro’mo tu kamabukuangku natumang salaku, sia langga’ mintu’ bukungku.

¹² Tu belanna mintu’ to uneana’ angku ditanda to kadake, ondongpi dio mai sangbanuangku, sia napotiramban sitanda-tandangku; sia minda-minda untirona’ dio lu lalan napallaianna’.

¹³ Napasalaimo’ penaanna tau butung to mate, sangtintimo’ to kurin tesse.

¹⁴ Belanna kurangimo tu kada boko’na buda tau, – kamatakuran tiku lao –; samaturu’ umpata’paina’ lima, sia undaka’ lalan ungka’tu sunga’ku.

¹⁵ Apa mati’ Kalemi kunii sande’, o PUANG! kukua: Kamumo tu Kapenombangku.

¹⁶ Iatu toto’ku lan lisu pala’Mi; rampananna’ dio mai lisu pala’na mintu’ ualingku sia dio mai mintu’ to unnula’ sumpuna’.

¹⁷ Melo ke Mipaarrangi rupamMi tu taumMi, sia lendokanna’ tete dio kamasokanamMi.

¹⁸ O PUANG, da Mieloranna’ kasirisan, belanna meongli’na’ mati’ Kalemi; melo ke mintu’ to tang mekaaluk kasirisan, da’ito nakatiro-tiro lan lino to mate.

¹⁹ Da’ito namamang tu puduk mo’rang, tu matampo ungkada-kadai to malambu’, sia madongnga’ sia patelle.

²⁰ Tangpada kapuana tu kamasokanamMi, tu Miparandanan to ungkataku’Komi, sia iatu Mipogau’namo lako to umpentionganniKomi, tu nata’pai matanna mintu’ ma’rupa tau.

²¹ Tau iato mai Mionganni dio mai tengko turu’ kadakena tolino, dio to’ inan narerung oloMi. Sia Mirinding pala’ lan misa’ lantang, dio mai lila passigaganna tau.

²² Mintu’na kadipudian lu lako PUANG, belanna Napakitammo’ pa’kamasean kalle-kallean, lan tondok ditambakuku.

²³ Tiramban tu penaangku angku ma’kada, kumua: Disualemo’ dio mai oloMi! Apa Mitananni sia talinga tu pengkamoyaku, tongku meongli’ Mati’.

²⁴ Kamali’mi tu PUANG e mintu’ to Naala mase; Narinding pala’ PUANG tu to maruru’, apa iatu to umpogau’ kamatampoan Napapakkanni kapua.

²⁵ Melo ke batta’komi sia kalebu penaammi, e kamu mintu’ to urrannuan PUANG.