PA’PUDIAN 30 - Sura' Madatu

Nanian pa’kurre sumangasan belanna katilendokan dio mai kasanggangan 30:1-13

¹ Pa’pudian dipopenani ma’kure sumanga’ urrara banua kabusunganNa Puang Matua. Pa’pudianna Daud.

² La kupekalangka’iKomi, o PUANG, belanna Miangka’mo’ langngan, sia tae’ Mieloranni tu ualingku umposendei tu diona kasanggangangku.

³ O PUANG, Kapenombangku, mangkamo’ meongli’ mati’ sia mangkamo’ Mipamatana.

⁴ O PUANG, mangkamo Miendekan tu deatangku lan mai lino to mate, sia mangkamo’ Mipatuo naurunganni tae’ angku tileak tama tondok tang merambu.

⁵ PakendekanNi pa’pudian tu PUANG, e mintu’ tu to Naala mase, sia pudii tu sanga madatunNa.

⁶ Belanna iatu kasengkeanNa sattu’ bangri, apa marendeng tu sokan kaboro’Na; iake rapa’i bongi malimongan diallonni, apa iake tilalekki masiang bu’tu la’tek silelean.

⁷ Iatongku manaman bangpa kukua ma’kada: inang tae’ angku la tilende’ len. –

⁸ O PUANG tete dio kamasokanamMi amMi pabantangi tu buntungku, Mibunimira tu lindoMi, kumane tiramban.

⁹ Mati’ Kalemi, o PUANG, kunii meongli’, sia lako Puang, kunii mengkamoya:

¹⁰ Apara upa’na tu raraku, ke tileakna’ rokko pa’tambunan? Ma’dinraka tu litak la umpudiKomi, ma’dinraka la umpa’peissanan kamarurusamMi?

¹¹ Patanannina’ talinga, o PUANG, sia kamaseina’, o PUANG, melo ke Kamumo patunduangku.

¹² Tangi’ tang marangaku Mipopembalimo kadande’rekan, Mileakammo tu poteku, amMi patambeke’ina’ kaparannuan.

¹³ Kumua napakendekangKomi pa’pudian deatangku sia tang napaka’tu, o PUANG, Kapenombangku, la kupudiKomi sae lakona.