PA’PUDIAN 28 - Sura' Madatu

Puang Matua balulang toto’na to ma’patongan 28:1-9

¹ Pa’pudianna Daud. Mati’ Kalemi, o PUANG, kunii meongli’, o buntu batungku, da Mima’pakappa untiro-tirona’, kumua iake tae’i Midampangna’, da angku butung to tama lo’ko’.

² Perangii tu pengkamoyaku, ke meongli’na’ mati’ Kalemi, sia ke umpatadona’ pala’ku lako inan mandu maindan lan kabusungamMi.

³ Da Mipasiurakkina’ to tang mekaaluk, sia sola to umpogau’ kakadakean, tu umpokada mammi’ sola-solana, apa lan penaanna den tangnga’ kelok.

⁴ Papakkanni tu tau iato mai sitinaya gau’na, sia sitinaya kakadakeanna penggauranna; papakkanni sitinaya lalan limanna, pabala’i tau iato mai sitinayanna tu napogau’na.

⁵ Belanna tae’ nadampangi tau iato mai tu mintu’ penggauranNa PUANG, ba’tu panggaraga limanNa, Iamoto la Napempa’nakan tu tau iato mai sia tae’mo anNa la umbangunanni sule.

⁶ Mintu’na kadipudian lu lako PUANG, belanna Natanannimo talinga tu pengkamoyaku.

⁷ PUANGmo kamatotorangku sia balulangku; Iamo nakatappa’i penaangku, angku appa’mo pa’tunduan. Iamoto anna sende paiman tu penaangku sia la kupakendekan pa’pudi-pudiangku.

⁸ PUANGmo kamatotoranna taunNa, sia Iamo tambakuku nanii kamakarimmananna taunNa tu mangka Natokko.

⁹ Lendokanni tu taumMi sia pamasakkei tu mana’Mi, kambi’i sia kaduttu’i sae lakona.