PA’PUDIAN 24 - Sura' Madatu

Kasaeanna Datu mala’bi’ 24:1-10

¹ Misa’ pa’pudian dio mai Daud. Iatu lino sola mintu’ issinna PUANG tu ampunna, iamotu tana kalua’ sia mintu’ apa tongkon lan.

² Belanna Iamo unnoton parandanganna lino dao tasik, sia umpabantangi dao minanga kalua’.

³ Mindara tu ma’din kendek langngan buntunNa PUANG, sia mindara ma’din bendan dio inan maindanNa?

⁴ Iamotu to masero pindan limanna sia sallo’ penaanna, tu tang ungkabarii tang kebattuanna, sia tang umpalao sumpa tang tongan.

⁵ Iamoto tu la unnappa’ karongkosan dio mai PUANG, sia kamaloloan dio mai Puang Matua oto’na kasalamaranna.

⁶ Iamora te mai tu to tama bilangan to umpekutanan Puang, iamotu to undaka’ rupamMi, iamotu Yakub! Sela

⁷ Angka’i tu ampangmi, e mintu’ babangan, sia tikillangkomi, e ba’ba matontongan, anna tama tu Datu kabarre-alloan!

⁸ Mindara tu datu kabarre-alloan? Iamo PUANG londongna sia lalong, tu PUANG lalong lan kasirarian!

⁹ Angka’i tu ampangmi, e mintu’ babangan, sia tikillangkomi, e ba’ba matontongan, anNa tama tu Datu kabarre-aloan!

¹⁰ Mindara Ia tu Datu kabarre-alloan? Iamo PUANGna mintu’ ma’dandan maritik, Iamora to tu Datu kabarre-alloan. Sela