PA’PUDIAN 20 - Sura' Madatu

Passambayangna to buda kumua anna patalo tu datu 20:1-10

¹ Lu lakona pangala sengo. Pa’pudianna Daud.

² Sangapaoi Natanannikomi talinga PUANG lan attu kapussakan, sia tang nairi’komi angin naonganni sanganNa Kapenombanna Yakub.

³ Sia ussua pa’tunduan lan mai inan kabusungan, sia ussande’komi lan mai Sion.

⁴ Sia ungkilalai mintu’ pemala’mi, sia umpopaiman mintu’ pemala’ ditunu pu’pu’mi. Sela

⁵ Sangapoi anNa pa’kamaseanni mati’ tu lanna penaammi, anNa padenangkomi tu mintu’na lalan tangnga’mi.

⁶ La unnarrakkan belanna kapataloammi, sia la umpakendekki’ bandera ussa’bu’ sanganNa kapenombanta. Sangapaoi anNa padenangkomi PUANG tu mintu’na mipalakunna.

⁷ Totemo kukanassaimo kumua Naba’gi kapataloan PUANG tu to Natokko, Ia umpebalii lan mai suruga, inan kabusunganNa tete dio kamatotoran lima kananNa tu merampanan.

⁸ Den tu tau ussattuan kareta, sia den ussattuan darang, apa iatu kita ussattuangki’ sanganNa PUANG Kapenombanta.

⁹ Iatu tau iato mai tisumbang anna tobang, apa kita te malimbangunki’ anta bantang bendan.

¹⁰ O PUANG, ba’gii kapataloan tu datu, sia tanding talingakanni, ke meongli’kanni.